Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 205 Hüküm no: 147 Orijinal metin no: [50a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çelebi b. İbrahim’in küçük çocukları İbrahim ve Şerife Ayşe’ye vasî tayini Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Baba Haydar Nakşibendî mahallesinde sâkin iken bundan akdem vefât eden Ahmed Çelebi b. İbrahim’in sulbî sagīr oğlu es-Seyyid İbrahim ile sulbiye sagīre kızı Şerîfe Âişe’nin tesviye-i emirlerine kıbel-i şer‘den bir vasî nasbı lâzım ve mühim olmağın emânet ile ma‘rûf ve diyânet ile mevsûf, her vechile vesâyet uhdesinden gelmeğe kādir idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan sagīrân-ı mezbûrânın akribâlarından işbu râfi‘u’l-kitâb es-Seyyid Ahmed Ağa b. Davud’u hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sagīrân-ı mezbûrânın tesviye-i emirlerine vasî nasb ve ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımelerin kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’s-sâmin min-Cumâdelâhir li-seneti semân ve erba‘în ve miete ve elf. Şuhûdü’l-hâl: el-Hâc Yusuf b. Abdullah, es-Seyyid Mehmed b. Davud, es-Seyyid Mehmed Ağa b. es-Seyyid Mustafa, Ahmed Efendi b. Mustafa, Hasan Çelebi b. Ali.