Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 420 Hüküm no: 495 Orijinal metin no: [66b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pîr Mehmed Beşe’nin kaçak kölesini yakalayan Sefer Paşazâde Mustafa Ağa’nın elinden alıp tekrar kaçmasına sebep olan Bostancı Mustafa ile olan davada sulh olduğu Vilâyet-i Rumeli’nde Malkara ahâlîsinden Pîr Mehmed Beşe b. Hüseyin nâm kimesne meclis-i şer‘de hadâyik-i sultâniyeden Davud Paşa bahçesi bostancılarından bâ‘isü’l-kitâb Mustafa b. Sâlih nâm kimesne mahzarında ikrâr-ı tâm ve takrîr-i kelâm edip orta boylu, elâ gözlü, açık sarı kaşlı, sarışın, Rûsiyyü’l-asl Siyavuş b. Abdullah nâm abd-i memlûküm bundan akdem firâr eyledikden sonra hâlâ mahmiye-i İstanbul’da kethüdâyeri olan Sefer Paşazâde Mustafa ahz edip benim için hıfz üzre iken mezbûr Bostancı Mustafa mevsûf-ı mezbûr için bizim yoldaşlarımızdandır deyû mevsûf-ı mezbûru merkūm Mustafa Ağa’nın yedinden ahz ettikden sonra mevsûf-ı mezbûr firâr etmekle, mevsûf-ı mezbûrun kıymeti olan yüz kırk dört esedî guruşu mezbûr Bostancı Mustafa’dan mukaddemâ hâkim-i muvakki‘-i sadr-ı kitâb huzûrunda da‘vâ ettiğimde ol dahi inkâr etmekle müdde‘âmı dergâh-ı âlî yeniçerilerinden yirmi yedinci sekbânlarına mahsûs oda yoldaşlarından Mehmed Beşe b. Abdullah ve Yunus Beşe b. Mehmed nâm kimesneler şehâdetleri ile mezbûr Bostancı Mustafa muvâcehesinde isbât edip mevsûf-ı mezbûrun kıymet-i şer‘iyyesi olan yüz kırk dört esedî guruşu bana zâmin olmak üzre mezbûr Bostancı Mustafa üzerine hükm olundukdan sonra muslihûn tavassut edip mezbûr Bostancı Mustafa ile beynimizde doksan esedî guruş üzerine inşâ-i akd-i sulh ettiklerinde ben dahi sulh-i mezbûru kabûl edip bedel-i sulh-i mezbûru merkūm Bostancı Mustafa yedinden tamâmen ahz u kabz ettiğimden sonra husûs-ı mezbûra müte‘allika âmme-i de‘âvâdan merkūm Bostancı Mustafa’nın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin Recebi’l-ferd li sene seb‘a ve seb‘în ve elf. Şuhûdü’l-hâl: Es-Sâbikūn.