Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 207 Hüküm no: 149 Orijinal metin no: [50b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sadabad Ustası Ahmed Ağa’dan küçük çocukları Ebubekir ve Havva’ya mahkeme tarafından nafaka bağlandığı Mahmiye-i İstanbul’da ( ) mahallesinde sâkine olup zâtı ta‘rîf-i şer‘î ile mu‘arrefe olan işbu râfi‘atü’l-kitâb Rukiye Hatun bt. İbrahim medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de meclis-i şer‘-i şerîf-i enverde Sadaba[d] ustası Ahmed Ağa b. ( ) muvâcehesinde ikrâr ve takrîr-i kelâm edüp işbu hacr ve terbiyemde olan Ebûbekir ve Havva nâm sagīrelerin nafaka ve kisve-bahâya eşedd-i ihtiyâcları olmağla babaları olup hazır bi’l-meclis olan mezbûr Ahmed Usta üzerine kadr-ı ma‘rûf nafaka ve kisve-bahâ farz ve takdîr olunmak <> matlûbumdur dedikde merkūme Rukiye’nin takrîri vâkı‘a mutâbık <> olup ve zikr[i] âtî nafaka kadr-ı ma‘rûf idüği muhakkak olmağın hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sagīretân-ı mezbûretânın nafaka ve kisveleri içün tarafeynin rızâlarıyla babaları mezbûr Ahmed Usta üzerine târih-i kitâbdan beher yevm sekizer akçe nafaka ve kisve-bahâ farz ve takdîr buyurup meblağ-ı mefrûz-ı mezbûru sagīretân-ı mezbûretânın nafaka ve sâir havâic-i zarûriyelerine harc ve sarfa ve lede’l-iktizâ istidâneye ve inde’z-zafer babaları mezbûr Ahmed Usta üzerine rücû‘a izin vermeğin mâ-vaka‘a bi’t-taleb ketb olundu. Fi’l-yevmi’s-sâmin min-Cumâdelâhir li-seneti semân ve erba‘în ve miete ve elf. Şuhûdü’l-hâl: Mustafa Efendi b. Hüseyin, Ahmed Efendi b. Mustafa Efendi, es-Seyyid Ahmed Efendi b. el-Kādî bi-Ürgüb muvakkaten, es-Seyyid Mehmed b. es-Seyyid Mustafa, Hüseyin Çelebi [b.] Mehmed.