Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 208 Hüküm no: 151 Orijinal metin no: [51a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Çelebi b. Abdullah’ın, boş arsasını Hatice Sultan’ın baltacılarından İbrahim Ağa b. Hüseyin’e sattığı Husûs-ı âti’l-beyânın mahâllinde ketb ü tahrîri içün savb-ı şer‘-i enverden Mevlânâ Ahmed Efendi b. Mustafa Efendi irsâl olunup ol dahi medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Fethi Çelebi mahallesinde vâki‘ İmâm el-Hâc Mehmed Efendi’nin ta‘lîm-i sıbyân eylediği mektebe varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde mahmiye-i İstanbul’da ( ) sâkin Süleyman Çelebi b. Abdullah meclis-i ma‘kūd-ı mezkûrda hazret-i Hadîce Sultân -dâmet ismetühâ-nın teberdârlarından işbu râfi‘u’l-kitâb el-Hâc İbrahim Ağa b. Hüseyin mahzarında ikrâr ve takrîr-i kelâm edüp medîne-i mezbûrede Fethi Çelebi mahallesinde vâki‘ bir tarafdan vakıf bahçe ve bir tarafdan Kurşuncu Mustafa Çelebi menzili ve iki tarafdan müşteri-i mezbûr <<İbrahim Çelebi menzili derûnunda>> mezbûr el-Hâc İbrahim Ağa menzili derûnunda tahmînen altmış zirâ‘ arsa-i hâliyeyi tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile mezbûr <> el-Hâc İbrahim Ağa’ya yirmi guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr yirmi guruşu mezbûr el-Hâc İbrahim Ağa yedinden tamamen ahz u kabz eyledim; ba‘de’l-yevm arsa-i mahdûd-ı mezkûrda benim vechen mine’l-vücûh <> alâka ve medhalim kalmayıp mezbûr el-Hâc İbrahim Ağa’nın mülk-i müşterâsı ve hakk-ı sırfı olmuşdur; keyfe mâ yeşâ ve hasbemâ yehtâr mutasarrıf olsun dedikde gıbbe’t-tasdîkı’ş-şer‘î vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr Yakub Çelebi ve Muhzır es-Seyyid Mehmed ile meclis-i şer‘a gelüp her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-işrîn min-Cemâziyelâhir li-seneti semân ve erba‘în ve miete ve elf. Şuhûdü’l-hâl: el-Hâc Mehmed Efendi b. İbrahim, Mehmed Çelebi b. Hasan, Ali Çelebi b. Ahmed, Mehmed Çelebi [b.] Mustafa, İmâm Mehmed Efendi b. İbrahim Teber[d]âr, Teberdâr Mehmed Ağa b. Mustafa, Molla Hüseyin b. el-müezzin, Musa Odabaşı b. Veyis, el-Hâc Mustafa b. Bayram.