Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 209 Hüküm no: 152 Orijinal metin no: [51b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Çelebi b. Abdullah ve eşi Fatma bt. Mehmed ile Hatice Sultan’ın baltacılarından İbrahim Ağa b. Hüseyin’in, ev satışı, borç alma ve Fatma’nın mirası hususlarında birbirlerinin zimmetlerini ibra ettikleri Husûs-ı âti’l-beyânın ketb ü tahrîri içün savb-ı şer‘-i enverden Mevlânâ Ahmed Efendi b. Mustafa Efendi irsâl olunup ol dahi medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Fethi Çelebi mahallesinde vâki‘ İmâm el-Hâc Mehmed Efendi’nin ta‘lîm-i sıbyân eylediği mektebe varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde mahmiye-i İstanbul’da ( ) sâkin Süleyman Çelebi b. Abdullah meclis-i ma‘kūd-ı mezkûrda hazret-i Hadîce Sultân -dâmet ismetühâ-nın teberdârlarından işbu râfi‘u’l-kitâb İbrahim Ağa b. Hüseyin mahzarında ikrâr ve takrîr-i kelâm edüp mezbûr İbrahim Ağa yedinde mülk ve hakkı <> olduğu müsbet medîne-i mezbûrede Fethi Çelebi mahallesinde vâki‘ etrâf-ı erba‘ası lede’l-ahâlî ma‘lûm mülk menzilini bey‘ etmek murâdıyla târih-i kitâbdan üç sene mukaddem dört yüz guruş istidâne ve kabz ettikden sonra kable’l-bey‘ meblağ-ı mezbûr dört yüz guruşu yine bana def‘ ve teslîm ben dahi yedinden bi’t-tamam ve’l-kemâl alıp kabz eyledim; menzil-i mahdûd-ı mezkûr el-ân mezbûr İbrahim Ağa’nın mülkü ve hakk-ı sırfıdır; benim vechen mine’l-vücûh alâka ve medhalim olmamağla menzil-i mezkûra ve kızım müteveffât Fâtıma Hatun’un kalîl ve kesîr bi’l-cümle mirasa ve sâir ma‘lûm ve mechûle müte‘allika âmme-i de‘âvîden ben ve zevcem hâzıra bi’l-meclis olup zâtı ta‘rîf-i şer‘î ile mu‘arrefe olan Fâtıma bt. Mehmed mezbûr İbrahim Ağa’nın zimmetini ibrâ-i âmm ile ibrâ ve ıskāt eylediğimizde ol dahi kezâlik husûs-ı mezbûra müte‘allika âmme-i de‘âvîden bizim zimmetlerimizi ibrâ ve ıskāt edüp fîmâ-ba‘d birbirimiz ile da‘vâ ve husûmetimiz kalmamışdır dedikde gıbbe’t-tasdîkı’ş-şer‘î vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr Yakub Çelebi ve Muhzır es-Seyyid Mehmed ile meclis-i şer‘a gelüp her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 20 min-Cumâdelâhir sene 1148. Şuhûdü’l-hâl: Eş-şâhidûnü’s-sâbıkūn.