Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 420 Hüküm no: 496 Orijinal metin no: [66b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Halil Çavuş b. Mustafa’nın terekesi hususundaki davada sulh olduğu Mahmiye-i İstanbul’da Baba Hasan Alemî mahallesinde sâkin iken bundan akdem vefât eden Halil Çavuş b. Mustafa’nın verâseti zevce-i metrûkesi Râbia Hâtun bt. Şahin Mehmed Bey ile sulbiye kızları Âişe ve Emetullah nâm sagīrlere ve li ebeveyn kız karındaşı Neslihan nâm hâtun ve li ebeveyn er karındaşları Süleyman ve İsmail nâm kimesnelere münhasıra olduğu şer‘an mütehakkik oldukdan sonra mezbûrân Süleyman ve İsmail’e asâleten merkūme Neslihan Hâtun’un sadrî oğlu olup tarafından husûs-ı câ’i’l-beyâna vekîli olduğu mazmûn-ı vech-i şer‘î üzre müsbet yedinde olan hüccet-i şer‘iyye ile şer‘an sâbit olan Hasan Beşe b. Mustafa nâm kimesne vekâleten meclis-i şer‘-i hatîr-i lâzımü’t-tevkīrde mesfûre Râbia Hâtun mahzarında [her] biri asâleten ve vekâleten ikrâr ve takrîr-i kelâm edip müteveffâ-yı mezbûr hâl-i hayâtında mahalle-i mezbûrda vâki‘ senin menzilin arsası üzerine emrinle binâ edip kendi malından üç yük elli bin akçe masrûfu olmuşidi deyû meblağ-ı mezkûrdan hisse-i irsiyye-i şer‘iyyemizi bundan akdem mezbûre Râbia Hâtun’dan da‘vâ eylediğimizde ol dahi inkâr etmeğin beynimizde münâza‘ât-ı kesîre vukū‘undan sonra muslihûn tavassut edip merkūme Râbia Hâtun ile beynimizde nakd-i râyic fi’l-vakt on altı bin akçe üzre inşâ-i akd-i sulh eylediklerinde biz dahi asâleten ve vekâleten sulh-i mezbûru kabûl ve bedel-i sulh olan meblağ-ı mezkûru yedinden tamâmen alıp kabz edip husûs-ı mezkûre müte‘allika âmme-i de‘âvî ve mütâlebâtdan mezbûre Râbia Hâtun’un zimmetini ibrâ-i âmm-ı kātı‘ü’n-nizâ‘la ibrâ eyledik dediklerinde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min Recebi’l-ferd li sene seb‘a ve seb‘în ve elf. Şuhûdü’l-hâl: Hasan Efendi b. Mehmed Efendi el-İmâm, Yusuf Efendi b. Abdullah, çukadâr Sâlih Çelebi b. Yusuf, İsmail Çelebi b. Nezir, Selâmi Efendi b. Eyüb.