Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 421 Hüküm no: 497 Orijinal metin no: [66b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Hüseyin’in kendine ait üçte birlik bostan hissesini İsa v. Dimitri’ye sattığı Medîne-i Kayseriye’ye tâbi‘ Mancusu nâm karye sükkânından Hasan b. Hüseyin nâm kimesne meclis-i şer‘-i hatîr-i lâzımü’t-tevkīrde işbu bâ‘isü’s-sifr İsa v. Dimitri nâm Ermeni muvâcehesinde ikrâr-ı tâm ve takrîr-i kelâm edip bey‘-i âti’z-zikrin sudûruna değin sülüsü benim ve sülüsü Fâtıma bt. Ahmed nâm hâtunun ve sülüsü Halil ve Mihriban ibney Mehmed’in iştirâken mülkümüz olup karye-i mezbûre sınırında vâki‘ bir tarafdan Fâtıma bt. ( ) nâm hâtun bağı bir tarafdan Fereş nâm zimmî bağı ve bir tarafdan nehr-i cârî ve bir tarafdan tarîk-i âm ile mahdûd tahmînen iki buçuk dönüm bostan yerinden sülüs hisse-i şâyi‘amı tarafeynden îcâb ve kabûlü hâvî bey‘-i bâtt-ı sahîh-i şer‘î ile on kıt‘a esedî guruşa mezbûr İsa’ya bey‘ ol dahi vech-i muharrer üzre iştirâ ve kabûl eyledikden sonra semeni olan meblağ-ı mezbûr on esedî guruşu mezbûr İsa yedinden tamâmen ahz u kabz edip zikr olunan bostan yeri ve bağı mahallinde kabza mezbûr İsa’yı taslît eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min Recebi’l-ferd li sene seb‘a ve seb‘în ve elf. Şuhûdü’l-hâl: Kasım b. Ahmed, Hasan b. Abdullah, Ali Beşe, Hızır b. Abdullah, Ahmed Beşe b. Halil, Ahmed b. Mehmed, Hasan b. Hüdâverdi.