Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 422 Hüküm no: 498 Orijinal metin no: [66b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vârissiz ölen Ahmed’in bostancı olmadığı ve terekesinin tamamıyla devlete teslim edildiği Hâlâ mahmiye-i İstanbul’da şıkk-ı evvel defterdârı kāimmakāmı olan Emîrü’l-ümerâ’i’l-kirâm kebîrü’l-küberâi’l-fihâm Mehmed Paşa dîvân-ı eyvân-ı adâlet-ünvânda ma‘kūd meclis-i şer‘-i şerîfde bundan akdem mahmiye-i İstanbul’da bilâ-vâris vefât eden Ahmed b. ( ) nâm kimesnenin muhallefâtına bostancı olmak zu‘muyla taraf-ı beytülmâl için vâzı‘ü’l-yed olup hadîka-i hâssada vâki‘ bostancılara mahsûs dellâk odasından Ahmed Bey b. Halil ve Solak odasından Hasan Bey b. Hüseyin nâm kimesneler ile mahmiye-i merkūme[de] Bezzâz-ı Cedîd mahallesinde sâkin Mehmed b. Hüseyin nâm kimesneler mahzarlarında da‘vâ ve takrîr-i kelâm edip bilâ-vâris vefât eden bostancıların muhallefâtı bostancı ocağından zabt oluna gelmeğle mezbûr Ahmed vefât eyledikde mezbûrun muhallefâtını bostancı olmak üzre beytülmâl için mezbûrûn Ahmed Bey ve Hasan Bey ve Mehmed kabz edip ba‘dehû mezbûr Ahmed’in bostancı olmadığı zâhir ve mütehakkik oldukdan sonra muhallefâtı taraf-ı mîrîye âid olmağın merkūmân Ahmed Bey ve Hasan Bey ve Mehmed makbûzları olan nukūd ve eşyâyı defter-i kassâm mûcebince bana teslîm, ben dahi taraf-ı mîrî için ahz u kabz etmişdim, lâkin mezbûrûn defter-i kassâmdan hâric bir kîse akçe ve bir yük akçe kıymetli eşyâ-i ma‘lûmeyi getirip bana teslîm etmeyip yedlerinde kalmış idi, hâlâ taleb ederim suâl olunsun dedikde gıbbe’s-suâl mezkûrûn cevâblarında cümle tereke-i müteveffâ-yı mezbûru paşa-yı müşârün-ileyhe teslîm edip yedimizde tereke-i müteveffâ-yı mezbûrdan bir şey kalmamışdır dediklerinde, paşa-yı müşârün-ileyhden da‘vâsına muvâfık beyyine taleb olundukda ityân-ı beyyineden izhâr-ı acz ile istihlâf etmeğin fi’l-vâki‘ müteveffâ-yı mezbûrun terekesinden defter-i kassâmdan hâric bir kîse akçe ve bir yük akçe kıymetli eşyâ-i ma‘lûme yedlerinde kalmadığına vech-i şer‘î üzre merkūmûn Ahmed Bey ve Hasan Bey ve Mehmed’den her birilerine yemîn teklîf olundukda her biri alâ vefki’l-mes’ûl yemîn billâhi te‘âlâ etmeğin mûcebince bilâ-beyyine paşa-yı müşârün-ileyh mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Recebi’l-ferd li sene seb‘a ve seb‘în ve elf. Şuhûdü’l-hâl: Hâlâ şıkk-ı sânî defterdârı Şaban, umdetü’l-a‘yân İsmail, Şaban Ağa b. ( ) Ser-muhzırân, Eyüb Ağa b. ( ).