Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 243 Hüküm no: 183 Orijinal metin no: [61b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tokat’ta vefat eden Kıblelizâde Ömer Bey b. Ahmed Bey’in ½ ev hissesinin, eşi Hatice Hatun bt. Abdullah’a ait diğer ½ hisse ile birlikte Osman Efendi b. Şaban’a satıldığı Husûs-ı âti’l-beyânın mahâllinde ketb ü tahrîri iltimâs olunmağın savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Kiremidci Süleyman mahallesinde sâkin iken bundan akdem <> vilâyet-i Anadolu’da medîne-i Tokat’da müsâfiren vefât eden Kıblelizâde demekle ma‘rûf Ömer Bey b. Ahmed Bey’in hayatında sâkin olduğu menzile varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde müteveffâ-yı mezbûrun verâseti zevce-i menkûha-i metrûkesi Hadîce Hatun bt. Abdullah ile li-ebeveyn kız karındaşları Sâliha ve Rukiye nâm hatunlara ve li-ebeveyn ammi oğlu Mahmud Bey’e münhasıra ve tashîh-i mes’eleleri on iki sehimden i‘tibâr olunup sihâm-ı mezbûreden üç sehmi zevcesi mezbûre Hadîce Hatun’a ve dörder sehmi kız karındaşları mezbûretândan her birine ve bâkī bir sehmi Mahmud Bey’e isâbeti tahakkukundan sonra kendi tarafından asîl ve müteveffâ-yı mezbûrun zevcesi mezbûre Hadîce Hatun tarafından bey‘-ı âti’z-zikre vekîl olduğu zât-ı mezbûreyi ma‘rifet-i şer‘iye ile ârifân Osman Efendi b. Halil ve el-Hâc Mehmed b. Musa şehâdetleriyle sâbit ve sübût-i vekâletine hükm-i şer‘î lâhık <> olup ve müteveffâ-yı mezbûrun düyûn-ı müsbetesini edâya dahi kıbel-i şer‘den vasî nasb olunan mûmâ-ileyh Mahmud Bey ile kız karındaşları mezbûretân Rukiye ve Sâliha nâm hanımlar taraflarından kezâlik vekîl-i müsecceli [müseccel-i] şer‘îleri olan es-Seyyid Abdullah Ağa b. Halil Bey meclis-i ma‘kūd-ı mezkûrda işbu râfi‘u’l-kitâb Osman Efendi b. Şa‘bân mahzarında her biri bi’l-asâle ve bi’l-vekâle ve bi’l-vesâye ikrâr-ı tâm ve takrîr-i kelâm edüp mahalle-i mezbûrede vâki‘ bir tarafdan Abdi Ağa menzili ve bir tarafdan Mısırlı İbrahim Çelebi mülkü ve bir tarafdan ba‘zan debbağ el-Hâc Ahmed ve ba‘zan Haremeynü’ş-şerîfeyn Vakfı’ndan müşteri-i mezbûr tasarrufunda olan vakıf ve bir tarafdan tarîk-ı âm ile mahdûd hâriciyede iki bâb fevkānî oda ve sofa ve dehliz ve âbdesthâne ve iki kenîf ve bir ahır ve bi’r-i mâ ve bir mikdâr havluyu ve dâhiliyesinde fevkānî ve tahtânî dört bâb oda ve kilâ[r] ve iki hamam ve câmekân odası ve bir matbah ve sofa ve bi’r-i mâ ve zât-ı eşcâr-ı müsmire ve gayr-ı müsmire iki kıt‘a bahçe ve bir mikdâr [62a] havluyu muhtevî mülk menzilin nısfı ile’l-vefât müteveffâ-yı mezbûr Ömer Bey’in ve nısf-ı âharı dahi kezâlik müteveffâ-yı mezbûrun zevcesi müvekkile-i mezbûre Hadîce Hatun’un mülk ve hakkı olmağla menzil-i mezkûrun mecmû‘u mezbûre Hadîce Hatun’un rızâsıyla sûk-ı sultânîde ve mecma‘ü’n-nâs olan mahallerde ba‘de’l-müzâyede ve inkıtâ‘ı’r-rağbe mezbûr Osman Efendi üzerinde semen-i misli olan bin beş yüz guruşda karâr edüp ziyâde ile tâlib-i âhar zuhûr etmemekle mecmû‘-ı menzil-i mahdûd-ı mezkûru bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile mezbûr Osman Efendi’ye meblağ-ı mezbûr bin yedi yüz guruşa bey‘-ı bâtt-ı sahîh-i şer‘î ile her birimiz bi’l-verâse ve bi’l-vekâle ve bi’l-vesâye bey‘ ve temlîk ve teslîm eylediğimizde mezbûr Osman Efendi dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı [mezbûr] bin yedi yüz guruşu bizlere def‘ ve teslîm bizler dahi yedinden her birimiz bi’l-verâse ve bi’l-vekâle ve bi’l-vesâye bi’t-tamam ve’l-kemâl ahz u kabz eyledik; ba‘de’l-yevm menzil-i mahdûd-ı mezkûr mezbûr Osman Efendi’nin mülk-i müşterâsı ve hakk-ı sırfı olmuşdur; keyfe mâ yeşâ ve hasbemâ yehtâr mutasarrıf olsun dedikde gıbbe’t-tasdîkı’ş-şer‘î vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr Mustafa Çelebi b. [( )] ve Muhzır es-Seyyid Mehmed ile meclis-i şer‘a gelüp her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâlis-aşer <> min-Recebi’l-mürecceb li-seneti semân ve erba‘în ve miete ve elf. Şuhûdü’l-hâl: Osman Efendi b. Halil, el-Hâc Mehmed b. Mustafa, el-Hâc Mehmed b. Musa, Mehmed Ağa b. Ebûbekir, Hasan Beşe b., el-Hâc Mehmed, Mehmed Beşe b. Ahmed, Ahmed Ağa b. İbrahim, Yusuf b. Abdullah-ı Bostânî ve gayruhum mine’l-huzzâr.