Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 244 Hüküm no: 184 Orijinal metin no: [62a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tekerzâde Mustafa b. Mehmed ile kızları Emetullah ve Ayşe arasında tütün satışı konusunda yapılan mudarebe akdi Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Defterdâr Kara Süleyman mahallesi sâkinelerinden olup zâtları Hoca Mehmed Efendi b. Mustafa ve es-Seyyid Mehmed b. es-Seyyid Mustafa ta‘rîfleri ile mu‘arrefe Emetullah ve Âişe bintey el-Hâc Mustafa nâm hatunlar meclis-i şer‘-i <<şerîf>> hatîr-i lâzımü’t-tevkīrde Tekerzâde demekle ma‘rûf babaları işbu râfi‘u’l-kitâb mezbûr el-Hâc Mustafa b. Mehmed mahzarında her biri ikrâr-ı tâm ve takrîr-i kelâm edüp babamız mezbûr el-Hâc Mustafa medîne-i mezbûrede ticâret eylediği dükkânda mevcûd olup bundan akdem beher vukıyyesi yüzer akçeden cem‘an on beş bin akçeye bi’l-iştirâki’s-seviy bizlere bey‘ ve teslîm eylediği yüz elli vukıyye duhanı bizler dahi ba‘de’l-kabz yine babamız mezbûr el-Hâc Mustafa’ya bi-tarîkı’l-mudârebe teslîm ve yine dükkân-ı merkūmda mevcûd olup ber-mûceb-i defter beher birine ta‘yîn-i semen ile yine bizlere bey‘ ve teslîm eylediği âlât-ı dükkân ve eşyâ-i sâireyi dahi yine bizler ba‘de’l-kabz babamız mezbûr el-Hâc Mustafa’ya i‘âre ve teslîm <> eylediğimizde ol dahi ber-minvâl-i meşrûh kabûl ve ta‘ahhüd ve tesellüm ve istirâne? [isti‘âre] ve kabz edüp beher sene tamamında zikrolunan duhandan hâsıl olan fâidin nısfını kendisi alıp ve nısf-ı âharını bizlere edâ ve teslîme ta‘ahhüd eyledi dediklerinde mezbûr el-Hâc Mustafa dahi kızları mukırretân-ı merkūmetânı vicâhen tasdîk ve ber-vech-i muharrer ta‘ahhüd etmeğin mâ-vaka‘a bi’t-taleb ketb olundu. Fi’l-yevmi’l-hâdî ve’l-işrîn min-Recebi’l-ferd li-seneti semân ve erba‘în ve miete ve elf. Şuhûdü’l-hâl: İbrahim Efendi b. Abdullah, Ali Efendi b. Mehmed el-müezzin, İsmail Efendi b. Mehmed, Hoca Mehmed Efendi, Molla Mehmed b. Abdurrahman, Mustafa Çelebi b. Yusuf, Mustafa Efendi b. Hüseyin, Ahmed Efendi b. Mustafa Efendi, Ahmed Çelebi b. el-Hâc İsmail, es-Seyyid Mahmud Efendi b. el-imâm, İsmail Çelebi b. el-Hâc Yusuf.