Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 245 Hüküm no: 185 Orijinal metin no: [62b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küçükçekmece nahiyesinin Katakule köyü ahalisinden Yeniçeri Ömer Beşe b. İsmail’in, evini hayatta iken eşi Arife Hatun bt. Abdullah’a hibe ettiğine hükmolunduğu Husûs-ı âti’l-beyânın mahâllinde istimâ‘ ve tahrîri içün savb-ı şer‘-i enverden Mevlânâ Ahmed Efendi b. Mustafa Efendi irsâl olunup ol dahi Havâss-ı Refî‘a kazâsı muzâfâtından Küçük Çekmece nâhiyesine tâbi‘ Katakule nâm karyede sâkin iken bundan akdem vefât eden Dergâh-ı âlî -dâme mahfûfen bi’l-ma‘âlî- yeniçerilerinin İkinci Cemâ‘ati’ne <> mahsûs oda neferâtından <> Ömer Beşe b. İsmail’in hayatında sâkin olduğu menzile varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde müteveffâ-yı mezbûrun zâhirde zevce-i menkûha-i metrûkesi Ârife Hatun bt. Abdullah’dan gayri vâris-i ma‘rûfu [olmayıp] terekesinin rub‘u zevcesi mezbûreye ve selâsetü erbâ‘ı cânib-i Beytü’l-mâl’e âid olduğu şer‘an zâhir ve müte‘ayyin oldukdan sonra zâtı ta‘rîf-i şer‘î ile mu‘arrefe işbu râfi‘atü’l-kitâb mezbûre Ârife Hatun meclis-i ma‘kūd-ı mezkûrda hâlâ mahmiye-i İstanbul’da Yeniçeri Beytü’l-mâl Emîni olup zikri âtî menzile bi’l-emâne vâzı‘u’l-yed olan fahrü’l-akrân el-Hâc İbrahim Ağa b. Ahmed tarafından vekîl-i sâbitü’l-vekâlesi Ahmed Ağa b. el-Hâc Mehmed mahzarında üzerine da‘vâ ve takrîr-i kelâm edüp zevcim müteveffâ-yı mezbûr Ömer Beşe b. İsmail b. Abdullah hâl-i hayatında yedinde mülkü ve hakkı <> olup karye-i mezbûrede vâki‘ bir tarafdan müteveffâ-yı mezbûrun âhar mülkü ve bir tarafdan Eyüb Beşe mülkü ve bir tarafdan Musa Çavuş mülkü ve bir tarafdan tarîk-ı âm ile mahdûd bir bâb tahtânî oda ve bir mikdâr havluyu müştemil mülk menzilini ba‘de’t-tahliyeti’ş-şer‘iye zevcim müteveffâ-yı mezbûr Ömer Beşe târih-i kitâbdan dört sene mukaddem bana huzûr-ı Müslimînde hîbe ve temlîk ve teslîm ve ben dahi meclis-i hîbede ittihâb ve temellük ve tesellüm ve kabz ve kabûl edüp menzil-i mahdûd-ı mezkûr benim mülk-i mevhûbem olmuş iken vekîl-i mezbûr menzil-i mahdûd-ı mezkûru <> terekeden olmak üzere bi-gayr-ı hakkın vaz‘-ı yed eder; suâl olunup kasr-ı yedine tenbîh olunmak matlûbumdur dedikde gıbbe’s-suâl ve’l-inkâr müdde‘iye-i mezbûreden müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden Büyük Çekmece nâhiyesine tâbi‘ Kalyoz nâm karyede sâkin Ahmed Ağa b. İbrahim Ağa ve es-Seyyid Hasan b. Hüseyin nâm kimesneler li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd, fi’l-hakīka müteveffâ-yı mezbûr Ömer Beşe b. İsmail b. Abdullah’ın hâl-i hayatında yedinde mülkü ve hakkı olduğu hâlde karye-i mezbûrede vâki‘ bir tarafdan müteveffâ-yı mezbûrun âhar mülkü ve bir tarafdan Eyüb Beşe mülkü ve bir tarafdan Musa Çavuş mülkü ve bir tarafdan tarîk-ı âm ile mahdûd bir bâb tahtânî oda ve bir mikdâr havluyu müştemil mülk menzilini ba‘de’t-tahliyeti’ş-şer‘iye târih-i kitâbdan dört sene mukaddem işbu zevcesi mezbûre Ârife Hatun’a bizim huzûrumuzda hîbe ve temlîk ve teslîm ol dahi meclis-i hîbede ittihâb ve temellük ve tesellüm ve kabz ve kabûl edüp mezbûre Ârife Hatun’un mülk-i mevhûbesidir; biz bu husûsa bu vech üzere şâhidleriz; şehâdet dahi ederiz deyü her biri edâ-i şehâdet-i şer‘iye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr el-Hâc Süleyman ve Muhzır es-Seyyid Mehmed ile meclis-i şer‘a gelüp her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâlis-aşer min-Şa‘bâni’l-mu‘azzam li-seneti semân ve erba‘în ve miete ve elf. Şuhûdü’l-hâl: Süleyman Çelebi b. Mustafa, İsmail Çelebi b. Ali, Canbaz Ali Beşe b., es-Seyyid Hasan b. Hüseyin, Hasan Çelebi b. Yusuf, Mustafa Efendi [b.] Mehmed.