Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 246 Hüküm no: 186 Orijinal metin no: [63a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küçükçekmece nahiyesinin Katakule köyü ahalisinden Yeniçeri Ömer Beşe b. İsmail’in evinin Ahmed Ağa b. İbrahim Ağa’ya satıldığı Husûs-ı âti’l-beyânın mahâllinde ketb ü tahrîri içün savb-ı şer‘-i enverden Mevlânâ Ahmed Efendi b. Mustafa Efendi irsâl olunup ol dahi Havâss-ı Refî‘a kazâsı muzâfâtından Küçük Çekmece nâhiyesine tâbi‘ Katakule nâm karyede sâkin iken bundan akdem vefât eden Dergâh-ı âlî -dâme mahfûfen bi’l-ma‘âlî- yeniçerilerinin İkinci Cemâ‘ati’ne mahsûs oda neferâtından Ömer Beşe b. İsmail’in hayatında sâkin olduğu menzile varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde müteveffâ-yı mezbûrun zâhirde zevce-i menkûha-i metrûkesi Ârife Hatun bt. Abdullah’dan gayri vâris-i ma‘rûfu olmayıp terekesinin rub‘u zevcesi mezbûreye ve selâsetü erbâ‘ı cânib-i Beytü’l-mâl’e âid olduğu şer‘an zâhir ve müte‘ayyin oldukdan sonra tâife-i mezbûrun Beytü’l-mâlini kabza me’mûr olup hâlâ mahmiye-i İstanbul’da Yeniçeri Beytü’l-mâl Emîni fahrü’l-akrân el-Hâc İbrahim Ağa b. Ahmed tarafından bey‘-ı âti’z-zikre vekîl olduğu Kapı Kethudâsı İsmail Ağa b. Mustafa ve Said Mustafa Efendi b. Mehmed şehâdetleriyle sâbit ve sübût-i vekâletine hükm-i şer‘î lâhık olan Ahmed Ağa b. el-Hâc Mehmed ile zâtı ta‘rîf-i şer‘î ile mu‘arrefe müteveffâ-yı mezbûrun zevcesi mezbûre Ârife Hatun’dan her biri meclis-i ma‘kūd-ı mezkûrda işbu râfi‘u’l-kitâb Ahmed Ağa b. el-Hâc İbrahim Ağa mahzarında bi’l-verâse ve bi’l-vekâle ikrâr-ı tâm ve takrîr-i kelâm edüp müteveffâ-yı mezbûrun ile’l-vefât yedinde mülk ve hakkı olduğu müsbet olup karye-i mezbûrede vâki‘ bir tarafdan mezbûre Ârife Hatun’un âhar mülkü ve bir tarafdan Eyüb Beşe mülkü ve bir tarafdan Musa Çavuş veresesi mülkü ve bir tarafdan tarîk-ı âm ile mahdûd bir bâb fevkānî oda ve bir sofa ve altında bir ahır ve bir fırın ve bir kenîf ve havluyu muhtevî mülk menzili cemî‘ tevâbi‘ ve levâhıkıyla tarafeynden îcâb ve kabûlü hâvî bey‘-ı bâtt-ı sahîh-i şer‘î ile mezbûr Ahmed Ağa’ya otuz guruşa her birimiz bi’l-verâse ve bi’l-vekâle bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr otuz guruşu mezbûr Ahmed Ağa bize def‘ ve teslîm ve bizler dahi bi-kadri’l-hısas yedinden bi’t-tamam ve’l-kemâl ahz u kabz eyledik; ba‘de’l-yevm menzil-i mahdûd-ı mezkûr mezbûr Ahmed Ağa’nın mülk-i müşterâsı ve hakk-ı sırfı olmuşdur; keyfe mâ yeşâ ve hasbemâ yehtâr mutasarrıf olsun dediklerinde gıbbe’t-tasdîkı’ş-şer‘î vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr el-Hâc Süleyman ve Muhzır es-Seyyid Mehmed ile meclis-i şer‘a gelüp her biri alâ-vukū‘ihî inhâ ve takrîr etmeğin mâ-vaka‘a bi’t-taleb [ketb] olundu. Fî 13 min-Şa‘bâni’l-mu‘azzam sene 1148. Şuhûdü’l-hâl: Süleyman Çelebi b. Mustafa, İsmail Çelebi b. Ali, Canbaz Ali Beşe b., es-Seyyid Hasan b. Hüseyin, Hasan Çelebi b. Yusuf, Mustafa Efendi [b.] Mehmed.