Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 423 Hüküm no: 499 Orijinal metin no: [67a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Ali b. Mehmed’in, evini ve kölesi Hasan’ı kızı Âmine’ye hibe ettiği Mahmiye-i İstanbul’da Kabakulak mahallesi ahâlîsinden el-Hâc Ali b. Mehmed nâm kimesne meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda ikrâr ve takrîr-i kelâm edip akd-i âtî sudûruna değin yedimde mülküm ve hakkım olup mahalle-i mezbûrda vâki‘ bir tarafdan zevcem İsmihan bt. Mehmed nâm hâtuna mukaddemâ semen-i ma‘lûma bey‘ ve teslîm ettiğim menzil ve bir tarafdan tarîk-i âm ve bir tarafdan Hoca Fâtıma nâm hâtunun mahalle-i mezbûrda avârıza vakf olan menzil ve bir tarafdan sulbiye kebîre kızım Âişe nâm hâtuna mukaddemâ semen-i ma‘lûma bey‘ ve teslîm eylediğim menzil ile mahdûd bir bâb fevkānî oda ve bir sofa ve bir bâb tahtânî oda ve bir dehlizi müştemil menzilimi fâriğan ani’ş-şevâgil ve ma‘lûmü’l-evsâf Rûsiyyü’l-asl Hasan b. Abdullah nâm abd-i memlûkümü sulbiye sagīre kızım bâ‘isetü’l-kitâb Âmine’ye şurût-ı müfsideden ârîye hibe-i sahîha-i şer‘iyye ile hibe edip yine sagīre-i mezbûre için velâyeten kabz eyledim min ba‘d menzil-i mahdûd-ı mezbûr ile mevsûf-ı mezbûr Hasan sagīre-i merkūme Âmine’nin mülk-i mevhûbudur benim kat‘â alâka ve medhalim yokdur dedikde mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min Recebi’l-ferd li sene seb‘a ve seb‘în ve elf. Şuhûdü’l-hâl: Ahmed Efendi b. Ali el-İmâm, es-Seyyid Mehmed Efendi b. Mustafa el-İmâm, Süleyman Halîfe b. Mustafa el-Müezzin, Mehmed b. Mehmed, el-Hâc Ömer b. Nuri, Mustafa b. Murad, Mustafa b. Musli, el-Hâc Hasan b. Memi, el-Hâc Sefer b. Ömer.