Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 276 Hüküm no: 209 Orijinal metin no: [72b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeniçeri İbrahim Odabaşı b. Yakub’tan Beytülmal’e intikal eden ¾ ev hissesinin Mehmed Ağa b. Mustafa’ya satıldığı Dergâh-ı âlî -dâme mahfûfen bi’l-ma‘âlî- yeniçerilerinin Doksan Bir Cemâ‘at odası mütekā‘idlerinden olup medîne-i hazret-i Ebî Eyüb-i Ensârî -aleyhi rahmetü Rabbihi’l-Bârî-de Bıçakcı mahallesinde sâkin iken bundan akdem vefât eden İbrahim Odabaşı b. Yakub’un zâhirde zevce-i menkûha-i metrûkesi Safiye Hatun bt. Abdullah’dan gayri vârisi [vâris-i] ma‘rûfu olmayıp terekesinin rub‘u zevcesi mezbûreye ve selâsetü erbâ‘ı cânib-i Beytü’l-mâl’e âid olmağın tâife-i mezbûrun Beytü’l-mâlini kabza me’mûr olup hâlâ mahmiye-i İstanbul’da Yeniçeri Beytü’l-mâl Emîn[i] olan fahrü’l-akrân el-Hâc İbrahim Ağa b. Ahmed Ağa taraflarından bey‘-ı âti’z-zikri ikrâra vekîl-i sâbitü’l-vekâlesi olan Kapı Kethudâsı İsmail Ağa b. Mustafa meclis-i şer‘-i şerîf-i enverde fahrü’l-emâsil ve’l-akrân işbu bâ‘isü’l-kitâb es-Seyyid Mehmed Ağa b. Mustafa mahzarında bi’l-vekâle ikrâr-ı tâm ve takrîr-i kelâm edüp müteveffâ-yı mezbûrun ile’l-vefât yedinde mülkü ve hakkı idüği müsbet olup mahalle-i mezbûrede vâki‘ bir tarafdan müşteri-i mezbûr es-Seyyid Mehmed Ağa mülkü ve bir tarafdan Abdüsselam Çelebi Vakfı ve bir tarafdan Arab Efendi mülkü ve bir tarafdan tarîk-ı âm ile mahdûd bir bâb fevkānî oda ve bir sofa ve bir mağsel ve kenîf ve tahtânî bir bâb oda ve bi’r-i mâ ve zât-ı eşcâ[r-ı] müsmire ve gayr-ı müsmire bahçeyi muhtevî mülk menzilden selâsetü erbâ‘ı bi’l-izni’ş-şer‘î sûk-ı sultânîde ve mecma‘ü’n-nâs olan mahallerde nidâ ve müzâyede olunup ragabât-ı nâs bi’l-külliye munkatı‘a oldukdan sonra mezbûr es-Seyyid Mehmed Ağa üzerinde yirmi beş bin altı yüz elli akçede karâr edüp ziyâde ile tâlib-i âhar zuhûr etmeyip ve [meblağ-ı mezbûr] menzil-i mahdûd-ı mezkûrda olan selâsetü erbâ‘ının el-yevm semeni [semen-i] misli idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer oldukdan sonra mezbûr es-Seyyid Mehmed Ağa’ya yirmi beş bin altı yüz elli akçeye bâten bi’l-vekâle bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr yirmi beş bin altı yüz elli akçeyi mezbûr es-Seyyid Mehmed Ağa yedinden bi’t-tamam ve’l-kemâl ahz u kabz eyledim; ba‘de’l-yevm menzil-i mahdûd-ı mezkûrda olan selâsetü erbâ‘ı mezbûr es-Seyyid Mehmed Ağa’nın mülk-i müşterâsı ve hakk-ı sırfı olmuşdur; keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis ve’l-işrîn min-Şevvali’l-mükerrem li-seneti semân ve erba‘în ve miete ve elf. Ahmed Ağa b. Abdurrahim, Abdullah Beşe b. Abdullah, es-Seyyid Mehmed Ağa b. el-Hâc Hüseyin, Mustafa Çelebi b. Hüseyin, es-Seyyid Ahmed Efendi [b.] es-Seyyid Abdurrahim ve gayruhum mine’l-huzzâr.