Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 277 Hüküm no: 210 Orijinal metin no: [72b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hassa helvacılarından İbrahim Ağa b. Receb’in evinin Ayşe Hatun bt. Muharrem’e satıldığı Medîne-i hazret-i Ebî Eyüb-i Ensârî -aleyhi rahmetü Rabbihi’l-Bârî-de Çavuş Kasım mahallesinde sâkin iken bundan akdem vefât eden Hâssa helvâcılarından İbrahim Ağa b. Receb’in verâseti zevce-i menkûha-i metrûkesi Emine Hatun bt. Mustafa ile zî-rahm cihetinden vârisi olan Mehmed Ağa b. Ahmed’e münhasıra ve tashîh-i mes’elesi dört sehimden i‘tibâr olunup sihâm-ı mezbûreden bir sehmi zevcesi mezbûreye ve bâkī üç sehmi mezbûr Mehmed Ağa’ya isâbeti tahakkukundan sonra mezbûre Emine Hatun tarafından bey‘-ı âti’z-zikri ikrâra vekîl olduğu zât-ı mezbûreyi bi’l-ma‘rifeti’ş-şer‘iye ârifân Ahmed Efendi b. Derviş Ahmed ve Mehmed Ağa b. Ali şehâdetleriyle şer‘an sâbit ve sübût-i vekâletine hükm-i şer‘î lâhık olan Müezzin Molla Ali b. ( ) ve mezbûr Mehmed Ağa asâleten meclis-i şer‘-i şerîf-i enverde işbu râfi‘atü’l-kitâb Âişe Hatun bt. Muharrem tarafından tasdîka vekîl-i sâbitü’l-vekâlesi olan İshak Çelebi b. Ali mahzarında her biri bi’l-vekâle ve bi’l-verâse ikrâr-ı tâm ve takrîr-i kelâm edüp mahalle-i mezbûrede vâki‘ bir tarafdan Yoğurtçu İsmail mülkü ve bir tarafdan Hasan Kızı mülkü ve bir tarafdan Hâssa Mehterbaşı mülkü ve bir tarafdan tarîk-ı âm ile mahdûd dâhiliyede [73a] üç bâb oda ve bir mağsel ve dehliz ve sofa ve tahtânî iki bâb oda ve bir matbah ve bir bi’r-i mâ ve kenîf ve zât-ı eşcâr-ı müsmire ve gayr-ı müsmire bahçeyi muhtevî ve hâriciyede iki bâb fevkānî oda ve kenîf ve bir mikdâr havluyu müştemil mülk menzili bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî bey‘-ı bâtt-ı sahîh-i şer‘î ile müvekkile-i mezbûre Âişe Hatun’a altı yüz altmış guruşa her birimiz bi’l-vekâle ve bi’l-verâse bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr altı yüz altmış guruşu müvekkile-i mezbûre Âişe Hatun yedinden her birimiz bi’l-vekâle ve bi’l-verâse bi-kadri’l-hısas alıp kabz eyledik; ba‘de’l-yevm menzil-i mahdûd-ı mezkûr müvekkile-i mezbûre Âişe Hatun’un mülk-i müşterâsı ve hakk-ı sırfı olmuşdur; keyfe mâ yeşâ [teşâ] ve tahtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis ve’l-işrîn min-Şevvali’l-mükerrem li-seneti semân ve erba‘în ve miete ve elf min-hicreti men-lehu’l-izzü ve’ş-şeref. Mehmed Ağa b. Ali Ağa, Müezzin Molla Ali b. el-Hâc Ahmed, İshak Çelebi b. Ali, Mehmed Ağa b. Ali, Müderris Ali Efendi b. der-mahalle-i Kara Süleyman, Said Mehmed b. Mustafa. *** Temme’l-kelâm bi-avni’llâhi’l-Meliki’l-Allâm Nemekahü’l-fakīru ileyhi azze şânühu Mustafa el-müvellâ hilâfeten bi-medîneti hazreti Ebî Eyyûb el-Ensârî -ufiye anhü- Hâk-i pây-i fahr-i âlem Mustafa ***