Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 298 Hüküm no: 226 Orijinal metin no: [78b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Osman’ın, küçük oğlu Mehmed Emin’e intikal eden Hüsrev Kethuda Evkafı’na ait karlıklardaki hissesinin başkasına devrine mahkeme tarafından izin verildiği Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Câmi‘-i kebîr mahallesinde sâkin iken bundan akdem vefât eden Mehmed Ağa b. Osman’ın sulbî sagīr oğlu Mehmed Emin’in tesviye-i umûruna bâ-hüccet-i şer‘iye vasîsi olan işbu râfi‘u’l-kitâb el-Hâc Mustafa b. el-mezbûr Osman meclis-i şer‘-i şerîf-i enverde takrîr-i kelâm ve ta‘bîr ani’l-merâm edüp Hüsrev Kethudâ <> Evkāfı’ndan sekiz sehim i‘tibâr olunan karlıkdan bir sehmine temessük-i mütevellî-i evkāf mûcebince lede’l-ahâlî ve’l-cîrân ma‘lûmü’l-hudûd ve’l-müştemilât bâlâda mezkûr vech üzere bir sehim hissesi müteveffâ-yı mezbûrun ile’l-vefât taht-ı tasarrufunda olup ba‘dehû [ba‘de] vefâtihî sulbî sagīr oğlu Mehmed Emin’e intikāl-i âdî ile intikāl etdikden sonra karlık-ı mezkûrda sehm-i mezbûrun hâsıl[ı] harcına vefâ etmeyip ve sagīr-i mezbûrun zarûret-i nafakası dahi olmağla karlık-ı mezkûrdan intikāl-i âdîye binâen sagīr-i mezbûrun mutasarrıf olduğu bir sehim hissesi ba‘de’l-müzâyede ve inkıtâ‘ı’r-rağbe bedel-i misli ile âhara ferâğ ve bedel[i] istirbâh olunmak <<üzere kıbel-i şer‘den>> sagīr-i mezbûr hakkında her vechile enfa‘ ve evlâ olmağın karlık-ı mezkûrda olan sagīr-i mezbûrun bir sehim hissesi âhara ferâğ ve bedeli istirbâh olunmak üzere kıbel-i şer‘den izin verilmek bi’l-vesâye matlûbumdur dedikde vasîyy-i [mezbûru]n kelimât-ı meşrûhası vâkı‘a mutâbık idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri karlık-ı mezkûrda olan bir sehim hissesini ba‘de’l-müzâyede ve inkıtâ‘ı’r-rağbe bedeli [bedel-i] misli ve ma‘rifet-i mütevellî ile âhara ferâğa kıbel-i şer‘den vasîyy-i mezbûra izin vermeğin mâ-vaka‘a bi’t-taleb ketb olundu. Fi’t-târîhi’l-mezbûr, li’s-seneti’l-merkūme. Şuhûdü’l-hâl: Eş-şâhidûnü’s-sâbıkūn.