Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 303 Hüküm no: 232 Orijinal metin no: [80a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sadîler Şeyhi Hüseyin Efendi b. Şükrullah’ın, ayrıntıları yazılı olan vasiyetini yerine getirmek üzere Seyyid Ahmed Ağa b. Ali’yi vasî ve halifelerinden Şeyh Abdurrahman Efendi b. Yusuf’u da hasbî nâzır tayin ettiğine hükmolunduğu Husûs-ı âti’l-beyânın mahâllinde istimâ‘ ve tahrîri içün bi’[l-i]ltimâs bu fakīr medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Şahsultan mahallesinde sâkin iken bundan akdem vefât eden Sa‘dîler Şeyhi es-Seyyid Hüseyin Efendi b. Şükrullah’ın hayatında sâkin olduğu menzile varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde müteveffâ-yı mezbûrun ber-vech-i âtî vasîyy-i muhtârı olduğunu iddi‘â eden işbu râfi‘u’l-kitâb es-Seyyid Ahmed Ağa b. es-Seyyid Ali meclis-i ma‘kūd-ı mezkûrda müteveffâ-yı mezbûrun zevce-i metrûkesi olmağla terekesine bi’l-verâse vâzı‘atü’l-yed olup zâtı ta‘rîf-i şer‘î ile mu‘arrefe olan Hadîce Hatun bt. Abdullah mahzarında üzerine da‘vâ ve takrîr-i kelâm edüp müteveffâ-yı mezbûr es-Seyyid eş-Şeyh Hüseyin Efendi b. es-Seyyid Şükrullah b. es-Seyyid Hüseyin hâl-i marazında teberru‘ât-ı şer‘iyesi sahîha olduğu hâlde, bi-emrillâhi Te‘âlâ vefât eylediğimde mecmû‘-ı terekem ve zimem-i nâsda olan hukūkum ma‘rifet-i şer‘le ahz u kabz olunup sünnet-i seniyye üzere techîz ve tekfînim görül[dük]den sonra cemî‘ mâlımın sülüsü ifrâz olunup içünden kadr-ı ma‘rûf ıskāt-ı salât-ı fâitem ve ta‘mîr-i kabrim içün harc ve sarf olundukdan sonra bâkī-i sülüs-i mezkûrdan [80b] utekātım olan Fethi ve Gülbeyaz ve Âtike ve Âlîşâh ve Âlicenâb ve sagīre Halime ve İsmail’den her birine ellişer guruş verile ve bâkī kalan sülüs-i mâlım dahi re’y-i hâkimü’ş-şer‘le vücûh-ı birre harc ve sarf oluna deyü huzûr-ı Müslimînde vasiyet ve tenfîzine beni vasîyy-i muhtâr nasb ve ihtiyâr ve hulefâsından işbu hazır bi’l-meclis es-Seyyid eş-Şeyh Abdurrahman Efendi b. Yusuf’u dahi hasbî nâzır nasb ve ta‘yîn eyledikde biz dahi ber-vech-i muharrer vesâyet ve nezâreti <> ba‘de’l-kabûl musırrân alâ-îsâihî fevt olmağla hâlâ tenfîz-i vesâyâ murâd eylediğimde zevce-i mezbûre Hadîce Hatun mümâna‘at eder; suâl olunsun dedikde gıbbe’s-suâl mezbûre Hadîce Hatun cevâbında tereke-i müteveffâ-yı mezbûra bi’l-verâse vâzı‘-ı [vaz‘-ı] yedini ikrâr lâkin <> ber-minvâl-i muharrer müdde‘î-i mezbûrun vesâyetini inkâr edicek müdde‘î-i mezbûrdan sıdk-ı makālini mübeyyine beyyine taleb olundukda udûl-i ahrâr-ı ricâl-i Müslimînden medîne-i mezbûrede Câmi‘-i kebîr mahallesinde sâkin Mehmed Çelebi b. Ali ve eş-Şeyh Ahmed Efendi b. Ali ve İsmail Efendi b. el-Hâc Osman nâm kimesneler li-ecli’ş-şehâde meclis-i ma‘kūd-ı mezkûra hâzırûn olup isre’l-istişhâd, fi’l-hakīka müteveffâ-yı mezbûr Sa‘dîler Şeyhi es-Seyyid eş-Şeyh Hüseyin Efendi b. Şükrullah b. es-Seyyid Hüseyin hâl-i marazında teberru‘ât-ı şer‘iyesi sahîha olduğu hâlde, bi-emrillâhi Te‘âlâ vefât eylediğimde mecmû‘-ı terekem ve zimem-i nâsda olan hukūkum ma‘rifet-i şer‘le ahz u kabz olunup sünnet-i seniyye üzere techîz ve tekf[îni]m görüldükden sonra cemî‘ mâlımın sülüsü ifrâz olunup içünden kadr-ı ma‘rûf ıskāt-ı salât-ı fâitem ve ta‘mîr-i kabrim içün harc ve sarf olundukdan sonra bâkī-i sülüs-i mezkûrdan utekātım olan Fethi ve Gülbeyaz ve Âtike ve Âlîşâh ve Âlicenâb ve sagīre Halime ve İsmail’den her birine ellişer guruş verile ve bâkī [kalan] sülüs-i mâlım dahi re’y-i hâkimü’ş-şer‘le vücûh-ı birre harc ve sarf oluna deyü bizim huzûrumuzda vasiyet ve ber-minvâl-i muharrer vesâ[yâ]sını tenfîze işbu müdde‘î-i mezbûr es-Seyyid Ahmed Ağa’yı vasîyy-i muhtâr nasb ve ta‘yîn ve işbu hazır bi’l-meclis es-Seyyid eş-Şeyh Abdurrahman Efendi b. es-Seyyid Yusuf’u dahi hasbî nâzır nasb ve ta‘yîn eyledikde onlar dahi ber-vech-i muharrer vesâyet ve nezâreti ba‘de’l-kabûl musırra[n] aleyhâ fevt oldu; biz bu husûsa bu vech üzere şâhidleriz; şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm ve’t-tenbîh mâ-vaka‘a bi’t-taleb ketb olundu. Fi’l-yevmi’s-sânî-aşer min-Rebî‘i’l-evvel li-seneti tis‘a ve erba‘în ve miete ve elf. Şuhûdü’l-hâl: Türbedâr Ahmed Efendi b., Molla Mehmed b. Ali Efendi, es-Seyyid Abdülkerim Efendi b. es-Seyyid Mustafa, Abdurrahman b. Mustafa, Ese Beşe b. Hasan, Derviş Mehmed b. İsmail, Yunus Beşe b. Mehmed, es-Seyyid Mehmed b. es-Seyyid Mustafa, Mustafa Beşe b. Ali ve gayruhum.