Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 306 Hüküm no: 234 Orijinal metin no: [81a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sadîler Şeyhi Hüseyin Efendi b. Şükrullah’ın varislerinin, adı geçenin vasiyetini yerine getirmek üzere vasîsi olan Seyyid Ahmed Ağa b. Seyyid Ali’nin zimmetini miras hususunda ibra ettikleri Husûs-ı âti’l-beyânın mahâllinde ketb ü tahrîri iltimâs olunmağın savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Şahsultan mahallesinde sâkin iken bundan akdem vefât eden Sa‘dîler Şeyhi es-Seyyid Hüseyin Efendi b. es-Seyyid Şükrullah Efendi’nin hayatında sâkin olduğu menzile varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde müteveffâ-yı mezbûrun verâseti zevce-i menkûha-i metrûkesi Hadîce Hatun bt. Abdullah ile vâlidesi Fâtıma Hatun bt. Mehmed ve asabe-i nesebiye cihetinden vârisi olan es-Seyyid Hüseyin Ağa b. es-Seyyid Süleyman’a münhasıra olup kable’l-kısme mezbûre Fâtıma Hatun dahi vefât edüp verâseti sadriye kebîre kızı Şerîfe Fâtıma bt. es-Seyyid Abdülkerim’e münhasıra ve müteveffâ-yı evvel mezbûr es-Seyyid Hüseyin Efendi’nin sülüs-i vasiyyeti olmağla tashîh-i mes’elesi on sekiz sehimden i‘tibâr olunup sihâm-ı mezbûreden altı sehmi sülüs-i mezbûra ve üç sehmi zevcesi mezbûre Hadîce Hatun’a ve dört sehmi Şerîfe Fâtıma Hatun’a ve bâkī beş sehmi mezbûr es-Seyyid Hüseyin Ağa’ya isâbeti tahakkukundan sonra zâtları es-Seyyid Abdülkerim Efendi b. Mustafa ve el-Hâc Mehmed Ağa b. İsmail ta‘rîfleriyle mu‘arrefe olan mezbûretân Hadîce ve Şerîfe Fâtıma hatunlar ile mezbûr es-Seyyid Hüseyin Ağa meclis-i ma‘kūd-ı mezkûrda müteveffâ-yı mezbûrun sülüsünü tenfîze bâ-hüccet-i şer‘iye vasîyy-i muhtârı olmağla terekesine bi’l-vesâye vâzı‘u’l-yed olan işbu râfi‘u’l-kitâb es-Seyyid Ahmed Ağa b. es-Seyyid Ali mahzarında her biri ikrâr ve takrîr-i kelâm edüp mûrisimiz müteveffâ-yı mezbûr es-Seyyid Hüseyin Efendi’nin terekesi tahrîr ve ba‘de ihrâci’l-masârif ve’s-sülüs ber-mûceb-i defter-i kassâm-ı askerî tashîh-i mezbûr üzere hissemize isâbet eden bir yük yirmi bin beş yüz yirmi sekiz akçeyi vasîyy-i mezbûr terekeden olmak üzere <> bize def‘ ve teslîm edüp biz dahi ber-vech-i muharrer meblağ-ı mezbûru her birimiz bi-kadri’l-hısas alıp kabz edüp meblağ-ı mezbûrdan vasîyy-i mezbûr yedinde ve zimmetinde bir akçe ve bir habbe hakkımız bâkī kalmayıp ba‘de’l-yevm mûrisimiz müteveffâ-yı mezbûrun terekesine müte‘allika âmme-i miras da‘vâsından vasîyy-i mezbûrun zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dediklerinde gıbbe’t-tasdîkı’ş-şer‘î vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr Hüseyin Çelebi b. E[bû]bekir ve es-Seyyid Mehmed b. es-Seyyid Mustafa ile meclis-i şer‘a gelüp her biri alâ-vukū‘ihî inhâ ve takr[îr] etmeğin mâ-vaka‘a bi’t-taleb ketb olundu. Fi’l-yevmi’l-hâmis-aşer min-Rebî‘i’l-evvel li-seneti tis‘a ve erba‘în ve miete ve elf. Şuhûdü’l-hâl: Molla Mehmed b. Ali, es-Seyyid Abdurrahman Efendi b. es-Seyyid Yusuf, Abdurrahman Çelebi b. Mustafa, Mustafa Beşe b. Ali, Derviş Mehmed b. İsmail, el-Hâc Mehmed b. Halil.