Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 426 Hüküm no: 505 Orijinal metin no: [67a-7] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Belkıs bt. Abdullah’ın bazı ev eşyalarını câriyesi Vildan’a bağışladığı ve terekesinden kızlarına düşen pay için Halil Efendi b. Resul’ü vekil tayin ettiği Mahmiye-i İstanbul’da Akbıyık mahallesinde sâkine mefharü’l-muhadderât Belkıs bt. Abdullah nâm hâtun meclis-i şer‘-i şerîf-i lâzımü’t-teşrîfde takrîr-i kelâm ve ta‘bîr ani’l-merâm edip vaktâ ki bu dâr-ı dünyâ bî-sebât ve bî-bekā olup sıhhatin âkıbeti mevt ve devletin âhiri fevt na‘îmi zıll-ı zâil ve mukīmi dayf-ı râhil olduğunu mülâhaza ve külli nefsin zâ’ikatü’l-mevt mefhûm-ı şerîfi dahi ma‘lûmum olmağın âlem-i fenâ ve şuhûddan menzil-i bekā ve hulûda rıhlet etmezden mukaddem ba‘zı sadakāt-ı mezbûre inşâsına niyet ve müzâfen ilâ mâ ba‘de’l-mevt şöyle vasiyyet ederim ki bi irâdeti’l-melik ve’l-müte‘âl bu dâr-ı dünyâdan sarây-ı ukbâya irtihâl ettiğimde eşyâ-i memlûkemden iki yemeni yorgan ve iki müsta‘mel Bursa yastığı ve bir tencere ve bir beledî döşek ve iki sahan ve bir güğüm ve bir tepsi ve bir leğen ve bir ibrik ve bir müsta‘mel atlas kaftan ve bir minder müdebberem Vildan bt. Abdullah’a verile deyip husûs-ı mezbûru tenfîze ve terekemden sadriye sagīre kızlarım Rukiye ve Hâmide’ye isâbet eden emvâlini hıfz ve ahvâllerini zabta işbu hâzır bi’l-meclis Halil Efendi b. Resul’ü vasiyy-i muhtâr nasb ve ta‘yîn ve ihtiyâr eyledim dedikde, ol dahi vesâyet-i mezkûreyi kabûl ve hizmet-i lâzımesin edâya ta‘ahhüd etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min Recebi’l-ferd li sene seb‘a ve seb‘în ve elf. Şuhûdü’l-hâl: Abdurrahman Efendi el-İmâm, Hasan Halîfe b. ( ) el-Müezzin, Tâşîzâde? Hasan Ağa b. Ahmed, Mehmed Halîfe b. ( ) el-Müezzin, Gazanfer b. Tevekkül, Resul b. Rıdvan.