Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 58 Hüküm no: 12 Orijinal metin no: [4a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Makrihorya köyünden Taşçı İbrahim Beşe’nin terekesinden vasiyeti olan kısmının vârisi de olan yeğeni Hasan Beşe’ye satılması Husûs-ı âti’l-beyânın mahallinde ketb u tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi Havâss-ı Refîʻa kazâsına tâbi‘ Makrihorya karyesinde sâkin iken bundan akdem vefât eden Taşçı İbrahim Beşe b. Hasan’ın hayâtında sâkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde müteveffâ-i mezbûrun li-ebeveyn karındaşı oğlu ve hasren vârisi Hasan Beşe’ye münhasıra olup ve müteveffâ-i mezbûrun sülüs vasiyyeti olmağla tashîh-i meselesi üç sehmden i‘tibâr olunup sihâm-ı mezbûreden bir sehmi sülüs-i vesâyâsına ve iki sehmi mezbûr Hasan Beşe’ye isâbeti tahakkukundan sonra müteveffâ-i mezbûrun sülüs-i vesâyâsını tenfîzine bâ-hüccet-i şer‘iyye vasiyy-i muhtârı olan Murad Beşe b. Ali meclis-i ma‘kūd-ı mezkûrda işbu râfiʻü’l-kitâb merkūm Hasan Beşe mahzarında bi’l-vesâye ikrâr-ı tâm ve takrîr-i kelâm edip müteveffâ-i mezbûrun ile’l-vefât yedinde mülk ve hakkı idiği müsbet olup karye-i mezbûrede vâki‘ bir tarafdan Kethüdâ Ali Ağa menzili ve bir tarafdan el-Hâc Mehmed bağı ve bir tarafdan Ömer Odabaşı menzili ve bir tarafdan tarîk-i âm ile mahdûd iki bâb fevkānî oda ve bir sofa ve bir gasilhâne ve dehlîz ve altında ahır ve samanhâne ve kenîf ve bahçeyi muhtevî mülk menzilden tashîh-i merkūm üzere sülüsü olan bir sehm hisseyi bi’l-izni’ş-şer‘î baʻde’l-müzâyede ve inkıtâʻi’r-rağbe semen-i misli ile âhara beyʻe kıbel-i şer‘den me’zûn olduğuma binâen menzil-i mahdûd-ı mezkûrda olan bir sehm sülüs hisseyi sûk-ı sultânîde baʻde’l-müzâyede ve inkıtâʻi’r-rağbe merkūm Hasan Beşe üzerinde yirmi bin akçede karâr edip ve ziyâde ile tâlib-i âharı zuhûr etmeyip ve meblağ-ı mezbûr menzil-i mahdûd-ı mezkûrda olan sülüs hissenin el-yevm semen-i misli olduğu lede’ş-şer‘i’l-enver zâhir ve mukarrer oldukdan sonra menzil-i mezkûrda olan bir sehm sülüs hisseyi bi-cümleti’t-tevâbiʻ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mezbûr Hasan Beşe’ye semen-i misli olan meblağ-ı mezbûr yirmi bin akçeye bi’l-vesâye beyʻ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl ve kabz eylediğinden sonra semen-i misli olan meblağ-ı mezbûr yirmi bin akçeyi merkūm Hasan Beşe yedinden bi’l-vesâye ahz u kabz eyledim, baʻde’l-yevm menzil-i [4b] mahdûd-ı mezkûrda olan bir sehm sülüs hisse merkūm Hasan Beşe’nin mülk-i müşterâsı ve hakk-ı sırfı olmuşdur, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb u tahrîr, ba‘dehû ma‘an baʻs olunan ümenâ-i şer‘den Çukadâr el-Hâc İbrahim ve Muhzır es-Seyyid Mehmed ile meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’t-tâsiʻ ve’l-ışrîn min-Zilhicce li-sene sebʻa ve hamsîn ve mi’e ve elf. Şuhûdü’l-hâl: Süleyman Efendi b. İsmail, el-Hâc Hasan b. Yusuf, Salih Beşe b. Yusuf, el-Hâc Hüseyin b. Ahmed, Ali Kethüdâ b. Osman, Cafer Beşe b. Süleyman, Mehmed Beşe b. Mustafa Ağa ve gayruhum.