Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 426 Hüküm no: 506 Orijinal metin no: [67b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vakıf arsasının ulemâdan Mahmud Efendi [b.] Mehmed’e verildiği Efendi hazretlerinin imzâsıyladır. Merkūm ( ) nâm sâhibü’l-hayr vakf-ı lâzım ile vakf ve süknâsını ulemâdan bir recül-i sâlihe şart eylediği Dârü’l-hilâfeti’l-aliyye Kostantıniyye el-mahmiyye mahallâtından Dizdâriye mahallesinde vâki‘ bir tarafdan Dizdâriye câmi‘-i şerîfi ve ma‘bed-i latîfi haremi ve bir tarafdan merhûm Ahmed Çelebi veresesi mülkleri ve bir tarafdan ba‘zen mahalle-i mezbûre imâmına meşrûta vakıf menzil ve ba‘zen Sefer Bey mülkü ile mahdûde binâsı muhterik menzil arsasının ber mûceb-i şart-ı vâkıf tevcîh-i hâkim ile mutasarrıfı olan Ali Efendi fevt olup arsa-i mahdûde-i mezkûre mahlûle olmağın ulemâdan olup her vechile mahal ve müstahık olan işbu bâ‘isü’l-kitâb Mahmud Efendi [b.] Mehmed’e arsa-i mezkûre taraf-ı şer‘-i Nebevî’den tevcîh olunup tasarruf için işbu vesîka-i enîka ketb ve imlâ olunup yedine def‘ ve i‘tâ olundu. Fi’l-yevmi’s-sâdis ve’l-ışrîn min Recebi’l-mürecceb li sene seb‘a ve seb‘în ve elf. Şuhûdü’l-hâl: Mehmed Ağa b. Pîrî, Mustafa Çelebi b. Mehmed, sahhâf Resul Efendi, Ali Halîfe b. Mehmed, el-Hâc Ali Ağa b. Abdullah, fahrü’l-kuzât İbrahim Efendi b. Şeyh İbrahim Efendi, Süleyman Beşe b. Hızır, Ali Çelebi b. Mehmed.