Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 71 Hüküm no: 21 Orijinal metin no: [7b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil b. Mehmed’in vârislerinden olan kardeşi Sâliha Hatun’nun, kendisi ile kardeşi Ali’nin hissesini terekeden almaları Medîne-i Hazret-i Ebî Eyyüb el-Ensârî -radiye anhu rabbihi’l-bârî-’de Câmi‘-i Kebîr Mahallesiʼnde sâkin iken bundan akdem vefât eden Halil b. [Mehmed] Ömer’in verâseti zevce-i menkûha-i metrûkesi Safiye bt. Abdullah nâm hatun ile li-ebeveyn er karındaşı olup hâlâ diyâr-ı âharda olan Ali’ye ve li-ebeveyn kız karındaşı Sâliha’ya münhasıra olup ve mesele-i mîrâsları dört sehmden i‘tibâr olunup sihâm-ı mezkûreden bir sehmi zevcesi mezbûre Safiye’ye iki sehmi gāib-i mezbûr Ali’ye ve bâkī bir sehmi mezbûre Sâliha Hatun’a isâbeti tahakkukundan sonra gāib-i mezbûrun hissesini ahz u kabz u hıfza bâ-hüccet-i şer‘iyye kayyım nasb olunan mezbûre Sâliha Hatun tarafından husûs-ı âti’l-beyânı ikrâra vekîl-i müseccel-i şer‘îsi olan zevci Abdülfettâh Efendi b. el-Hâc Mustafa meclis-i şer‘-i hatîr-i lâzımü’t-tevkīrde müteveffâ-i mezbûr Halil’in zevcesi ve terekesine bi’l-verâse vâzıʻatü’l-yed olan işbu bâʻisetü’l-kitâb mezbûre Safiye Hatun bt. Abdullah mahzarında ikrâr ve takrîr-i kelâm edip ber-vech-i m[uharrer] müvekkilem mezbûre Sâliha’nın li-ebeveyn er karındaşı müteveffâ-i mezbûr Halil’in terekesi tahrîr ve ba‘de ihrâci’l-mesârif ve’d-düyûn ber-mûceb-i defter-i kassâm tashîh-i mezbûr üzere gāib-i merkūm Ali’nin nukūd ve eşyâdan hissesine isâbet eden sekiz bin iki yüz doksan sekiz akçe ve kezâlik zevcem ve müvekkilem merkūme Sâliha Hatun’un nukūd ve eşyâdan hissesine isâbet eden dört bin yüz kırk dokuz akçe ki cem‘an on iki bin dört yüz kırk yedi akçe hisse-i şer‘iyyelerini merkūme Safiye Hatun bana def‘ ve teslîm, ben dahi vekâlet-i mahkiyem hasebiyle yedinden bi’t-tamam ahz u kabz eyleyip mezbûre Safiye Hatun zimmetinde zikr olunan hisselerden bir akçe ve bir habbe kalmadı dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbiʻ min-Saferi’l-hayr li-sene semân ve hamsîn ve mi’e ve elf. Şuhûdü’l-hâl: Mehmed Efendi b. Ahmed, Mehmed Said Efendi b. İbrahim, Ömer Efendi b. Osman, Ömer Ağa b. el-Hâc Mehmed, es-Seyyid Mehmed Çelebi b. es-Seyyid Mustafa, Abdürrezzak Efendi b. el-Hâc Ali, Mehmed Çelebi b. Abdullah, Hüseyin Çelebi b. Mehmed, Mehmed Çelebi b. Ahmed, Musa Bey b. Ömer ve gayruhum.