Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 427 Hüküm no: 507 Orijinal metin no: [67b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Beşe b. Mehmed’in, Aslan v. David’deki alacağını taksitlendirdiği Katalan cemâ‘atinden Abraham v. Yasef ve Hayder v. David ve Portakal cemâ‘atinden Mosi v. Yasef ve İlya v. David ve Yako v. David nâm Yahudiler meclis-i şer‘-i hatîr-i lâzımü’t-tevkīrde işbu râfi‘ü’l-kitâb Ali Beşe b. Mehmed nâm kimesne mahzarında her biri ikrâr ve takrîr-i kelâm edip merkūm Ali Beşe’nin Portakal cemâ‘atinden işbu hâzır bi’l-meclis Aslan v. David nâm Yahudi zimmetinde cihet-i deyn-i şer‘îden dört yüz on yedi esedî guruş hakkı olup meblağ-ı mezbûra mukaddemâ emr [ve] kabûlü hâviye kefâlet-i sahîha-i şer‘iyye ile ale’l-iştirâki’s-seviy kefîl olmuşidik [vaktâ] ki meblağ-ı mezbûru merkūm Ali Beşe’ye def‘aten edâya iktidârımız olmamağla meblağ-ı mezbûru mezbûr Ali Beşe’ye târih-i kitâbdan bin gün tamâmına değin her otuz günde ikişer buçuk guruş vermek üzre taksît etmişidi, hâlâ meblağ-ı mukassat-ı mezbûrdan her otuz günde her birimizin hissesine lâzım gelen ikişer buçuk esedî guruşu merkūm Ali Beşe’ye edâ etmek üzre ta‘ahhüd eyledik dediklerinde gıbbe’t-tasdîk mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min Recebi’l-ferd li sene seb‘a ve seb‘în ve elf. Şuhûdü’l-hâl: Mehmed Çavuş el-Mübâşir, Gazanfer Bey b. Tevekkül, İbrahim Çelebi b. Ahmed, Mehmed Çelebi b. Ramazan, Hasan Çelebi b. Ahmed, Hüseyin b. Abdullah.