Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 76 Hüküm no: 26 Orijinal metin no: [8b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid el-Hâc Mustafa Ağa’nın vârislerinin terekeden hisselerini aldıkları Husûs-ı âti’l-beyânın mahallinde ketb u tahrîri iltimâs olunmağın savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Baba Haydar Nakşibendî Mahallesiʼnde sâkin iken bundan akdem vefât eden es-Seyyid el-Hâc Mustafa Ağa b. el-Hâc Mehmed’in hayâtında sâkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde müteveffâ-i mezbûrun verâseti vâlidesi olup vilâyet-i Anadolu’da Kula kasabasında sâkine Emetullah Hatun bt. ( ) ile sulbî kebîr oğlu es-Seyyid Mehmed Tahir’e ve sulbiye kebîre kızı Şerife Fâtıma Hatun’a münhasıra ve tashîh-i meseleleri on sekiz sehmden i‘tibâr olunup sihâm-ı mezbûreden üç sehmi vâlidesi mezbûre Emetullah Hatun’a ve on sehmi oğlu mezbûr es-Seyyid Mehmed Tahir’e ve bâkī beş sehmi kızı mezbûre Şerife Fâtıma’ya isâbeti tahakkukundan sonra zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan mezbûre Şerife Fâtıma Hatun meclis-i ma‘kūd-ı mezkûrda tereke-i müteveffâ-i mezbûra bi’l-verâse vâzıʻu’l-yed olan karındaşı işbu râfiʻu’l-kitâb mezbûr es-Seyyid Mehmed Tahir mahzarında bi’l-verâse ikrâr-ı tâm ve takrîr-i kelâm edip babamız müteveffâ-i mezbûrun terekesi ma‘rifet-i şer‘le tahrîr olunup ber-mûceb-i defter-i kassâm-ı askerî herbirimizin hissesine isâbet eden hisse-i irsiyyemizi tamamen ve kâmilen ahz u kabz eyledik dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb u tahrîr ba‘dehû ma‘an baʻs olunan ümenâ-i şer‘den Çukadâr el-Hâc İbrahim ve Muhzır es-Seyyid Mehmed ile meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’t-tâsiʻ min-Saferi’l-hayr li-sene semân ve hamsîn ve mi’e ve elf. Şuhûdü’l-hâl: Abdürrezzak Efendi b. el-Hâc Ali, Ahmed Efendi b. Ali, Mustafa Efendi b. Musa, el-Hâc Mehmed b. Hüseyin, Hasan Ağa b. Abdullah.