Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 77 Hüküm no: 27 Orijinal metin no: [8b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Ali’nin terekesi malından çocuklarına nafaka tahsis edilmesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Câmi‘-i Kebîr Mahallesiʼnde sâkine iken bundan akdem vefât eden Fâtıma bt. Ali nâm hatunun sadrî sagīr oğulları Mustafa ve Ahmed ile sadriye sagīre kızı Hanife’nin babaları ve tesviye-i emirlerine kıbel-i şer‘den bâ-hüccet-i şer‘iyye mansûb vasîleri olan işbu râfiʻü’l-kitâb Mehmed b. Abdullah meclis-i şer‘-i şerîf-i enverde takrîr-i kelâm ve tâʻbir ani’l-merâm edip vasîleri olduğum sıgār-ı mezbûrûnun nafaka ve kisveye eşedd-i ihtiyâçları olmağla vâlidesi müteveffât-ı mezbûreden müntakil mâlından kadr-i ma‘rûf nafaka ve kisve-bahâ farz ve takdîr buyrulmak matlûbumdur dedikde vasiyy-i mezbûrun kelimât-ı meşrûhası vâkıʻa mutâbık idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakki‘-ı sadr-ı kitâb tûbâ-lehû ve hüsnü-meâb efendi [9a] hazretleri sıgār-ı mezbûrûnun vâlideleri müteveffât-ı mezbûreden müntakil mâlından herbirine beher yevm dörder akçe nafaka ve kisve-bahâ farz ve takdîr buyurup meblağ-ı mefrûz-ı mezbûru sıgār-ı mezbûrûnun nafaka ve kisvelerine harc u sarfa ve lede’l-iktizâ istidâneye ve inde’z-zafer mâlından rücû‘a vasiyy-i mezbûra izin vermeğin mâ-vaka‘a bi’t-taleb ketb olundu. Fi’l-yevmi’l-âşir min-Saferi’l-hayr li-sene semân ve hamsîn ve mi’e ve elf. Şuhûdü’l-hâl: Mustafa Efendi b. Hüseyin, Ahmed Efendi b. Mustafa, es-Seyyid Mehmed b. es-Seyyid Mustafa, Mehmed Çelebi b. Mustafa, İbrahim Beşe b. Mehmed, Ahmed Beşe b. Ali, Abdullah b. Hüseyin, Hüseyin Çelebi b. Mustafa, Hüseyin Beşe b. Mehmed, Naʻlbend İsmail b. ( ), Ahmed b. İsmail ve gayruhum.