Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 78 Hüküm no: 28 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Andosa v. İstemaki’nin küçük kızı Oredore’nin vasisi Panayot’un azledilerek yerine Susane bt. Anderse’nin tayin edilmesi Fi’l-asl vilâyet-i Rumeli’de Mora cezîresinde Kalavrita kazâsından olup Mevlevîhâne Yenikapısı hâricinde bakkāl tâifesinden iken bundan akdem hâlik olan Andosa v. İstemaki’nin sâlifü’z-zikr Kalavrita kazâsında sâkine sulbiye sagīre kızı Oredore’nin hisse-i irsiyyesini ahz u kabz, zabt u hıfza ve tesviye-i umûruna bundan akdem vasî nasb u ta‘yîn olunan Panayot v. Niko’nun hiyâneti zâhir olup azli lâzım geldiğine binâen emânet ve istikāmet ile mevsûfe olup vesâyet uhdesinden gelmeğe kādire idiği zeyl-i kitâbda muharrerü’l-esâmî kimesneler ihbârlarıyla lede’ş-şer‘i’l-enver zâhir ve mukarrer olan min-kıbeli’l-eb ceddesi işbu râfiʻatü’s-sifr Susane bt. Anderse’yi hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri dahi mezbûre Panayot’u vesâyetten ihrâc ve sagīre-i mezbûrenin tesviye-i umûruna mersûme Susane Nasrâniye’yi vasî nasb u ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımesin kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’s-sâlis min-Saferi’l-hayr li-sene semân ve hamsîn ve mi’e ve elf. Şuhûdü’l-hâl: Mollâ Ali b. Hasan, es-Seyyid Mehmed b. es-Seyyid Mustafa, Ahmed Efendi b. Mustafa, Mehmed Çelebi b. Abdullah, es-Seyyid Ömer b. Hasan. İstemaki v. Panayot, Panayot v. Dimitri, Dimo v. Harido, Todori v. Yanaki, İskati v. İstemaki, Andosa v. Papa Kosta, Lazari v. Yanaki, İstoro v. Panayot.