Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 79 Hüküm no: 30 Orijinal metin no: [9a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçıvan Nikola v. Hiristo’nun, Hasan Ağa’nın bahçesinde bahçıvan iken ölen Yorgo v. Mihal’in vârisi olduğunu ispatlaması Vilâyet-i Rumeli’de Premedi kazâsına tâbi‘ Postanini nâm karye ahâlîsinden olup medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Silivrikapısı hâricinde vâki‘ asrında sekbanbaşı iken vefât eden Hasan Ağa’nın bahçesinde müstecir iken bundan akdem hâlik olan bahçıvân Yorgo v. Mihal’in ber-vech-i âtî li-ebeveyn ammisi olup hasren vârisi olduğunu iddiʻâ eden işbu râfiʻü’s-sifr bahçıvân Nikola v. Hiristo nâm zimmî meclis-i şer‘-i şerîf-i enverde Hâslar Beytülmâlı emîni olup tereke-i hâlik-i mezbûra bi’l-emâne vaz‘-ı yed eden İbrahim Ağa b. Halil mahzarında üzerine da‘vâ ve takrîr-i kelâm edip hâlik-i mezbûr Yorgo’nun babası Mihal ile li-ebeveyn karındaşlar olup babamız ismi Hiristo ve dedemiz ismi Nikola ve anamız ismi Anna bt. Nikola nâm Nasrâniye ve maskat-ı re’simiz sâlifü’z-zikr Premedi kazâsına tâbi‘ Postanini karyesi olup hâlik-i mezbûrun ben usûbet-i nesebiyye cihetinden li-ebeveyn ammisi ve hasren vârisi ve terekesine benden gayrı müstahikk-ı âhar olmayıp emîn-i merkūm tereke-i hâlik-i mezbûra bi’l-emâne vaz‘-ı yed eder, suâl olunsun dedikde gıbbe’s-suâl emîn-i merkūm cevâbında tereke-i hâlik-i mezbûra bi’l-emâne vaz‘-ı yedini ikrâr lâkin müdde‘î-i mezbûrun ber-vech-i muharrer ammisi olup hasren vârisi olduğunu inkâr edicek, müdde‘î-i mezbûrdan müdde‘âsını mübeyyine beyyine taleb olundukda udûl-ı ahrâr-ı ricâl-i Nasârâ’dan olup mahmiye-i İstanbul’da Tavukpazarı’nda mütemekkin tavukçu tâifesinden Niko v. Tora [ve] Paşmakçızâde Efendi bahçesinde mütemekkin Siço v. Yorgo nâm zimmîler li-ecli’ş-şehâde [9b] meclis-i şer‘a hâzırân olup isre’l-istişhâd fi’l-hakīka hâlik-i mezbûr Yorgo’nun babası Mihal ile işbu müdde‘î-i mesfûr Nikola nâm zimmî li-ebeveyn karındaşlar olup babaları ismi Hiristo ve dedeleri ismi Nikola ve anaları ismi Anna bt. Nikola nâm Nasrâniye ve maskat-ı re’sleri sâlifü’z-zikr Premedi kazâsına tâbi‘ Postana karyesi olup hâlik-i mezbûr müdde‘î-i mezbûr Nikola zimmî usûbet-i nesebiyye cihetinden li-ebeveyn ammisi ve hasren vârisi ve terekesine bundan gayrı müstahikk-ı âhar olduğu ma‘lûmumuz değildir, bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de riʻâyeti şerâiti’l-kabûl şehâdetleri makbûle olmağın mûcebiyle baʻde’l-hükm emîn-i mezbûrun kasr-ı yedine ba‘de’t-tenbîh mâ-vaka‘a bi’t-taleb ketb olundu. Fi’l-yevmi’s-sâdis aşer min-Saferi’l-hayr li-sene semân ve hamsîn ve mi’e ve elf. Şuhûdü’l-hâl: Mustafa Efendi b. Hüseyin, Ahmed Efendi b. Mustafa, es-Seyyid Mehmed b. es-Seyyid Mustafa, Ömer Efendi b. Osman, Hüseyin Çelebi b. Mehmed. Hiristo v. Siço, İstavri v. Apostol, Saraki v. Nikola, Miço v. Nikola, Milo v. Miro.