|
Eyüp Mahkemesi 175 Numaralı Sicil (H. 1157-1159 / M. 1745-1746)
cilt: 71, sayfa: 80
Hüküm no: 31
Orijinal metin no: [9b-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Bakkal tâifesinden Androsi v. İstemat’ın vârisleri arasında taksim edilen terekesi
Fi’l-asl vilâyet-i Rumeli’de Mora cezîresinde Kalavrita kazâsına tâbi‘ Kerpini nâm karye ahâlîsinden olup mahmiye-i İstanbul hısnı ebvâbından Mevlevîhâne Yenikapısı hâricinde bakkāl tâifesinden olup bundan akdem hâlik olan Androsi v. İstemat’ın verâseti zevce-i metrûkesi olup sâlifü’z-zikr karye-i mezbûrede mütemekkine Siyore bt. Papa Panayot ile anası Susane bt. Androsi’ye ve sulbiye sagīre kızı Androsi’ye münhasıra olduğu şer‘an zâhir ve müteʻayyen oldukdan sonra sagīre-i mezbûrenin ceddesi ve tesviye-i umûruna mansûbe vasiyyesi ve zevcesi mezbûrenin hisse-i irsiyyesini ahz u kabz, zabt u hıfza ve kendüye îsâle vekîl-i sâbitü’l-vekâlesi olan mezbûre Susane hâlik-i mezbûrun hayâtında şerîki ve veresesine îsâle vasîsi olan Panayot v. Perşiko nâm zimmî hâlik-i mersûmun terekesinden ber-mûceb-i defter-i kassâm ve hâric ez-defter mezbûre Susane’ye teslîm edip beyne’l-verese taksîm olunan meblağdır ki ber-vech-i âtî zikr olunur.
Fi’l-yevmi’r-râbiʻ aşer min-Saferi’l-hayr li-sene semân ve hamsîn ve mi’e ve elf.
Köhne nimten, 1 120 akçe Köhne dîmî, 1 60 akçe Köhne gömlek, 1 120 akçe Köhne kebe, 1 120 akçe Köhne kalpak, 1 30 akçe Bakkāl dükkânında olan âlât 6.000 akçe Dükkân-ı mezbûrda sermâye-i zehâir 13.320 akçe Hâlik-i mezbûrun zimmetinde cihet-i karzdan 12.000 akçe
Cem‘an yekûn: 31.770 akçe.
Minhâ el-ihrâcât:
Hâlik-i mezbûrun lâşesini ilkā-i hafr için masrûf 1.000 akçe Resm-i kısmet 780 akçe Kalemiye-i kâtib 180 akçe Çukadâriye 120 akçe İhzâriye 60 akçe Harc-ı hüccet-i vesâyet ve ahz [u] kabz 720 akçe Kaydiye 30 akçe Düyûn-ı müteferrika 200 akçe
Yekûnü’l-mesârif: 3.090 akçe.
Sahhe’l-bâkī li’t-taksîm beyne’l-verese: 28.680 akçe.
Hissetü’z-zevceti’l-mezbûre 3.585 akçe Hissetü’l-binti’l-mezbûre 18.819 akçe Hissetü’l-ümmi’l-mezbûre 6.273 akçe Kesr-i bâkī 3
 
|
