Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 81 Hüküm no: 33 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal tâifesinden Androsi v. İstemat’ın vârislerinden olan annesi Susane bt. Androsi’nin terekeden hissesini aldığı Husûs-ı âti’l-beyânın mahallinde ketb u tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Edirnekapısı hâricinde vâki‘ Tekye tâʻbir olunur mahalle varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde mahmiye-i İstanbul hısnı ebvâbından Mevlevîhâne Yenikapısı hâricinde bakkāl tâifesinden iken bundan akdem hâlik olan Androsi v. İstemat’ın verâseti zevce-i metrûkesi Siyore bt. Papa Panayot ile anası Susane bt. Androsi’ye ve sulbiye sagīre kızı Andore’ye münhasıra ve tashîh-i meseleleri bi-hükmi’r-red otuz iki sehmden i‘tibâr olunup sihâm-ı mezbûreden dört sehmi zevcesi mezbûreye ve yedi sehmi anası mezbûre Susane’ye ve yirmi bir sehmi sagīre-i mezbûre Andore’ye isâbeti tahakkukundan sonra sagīre-i mezbûrenin min-kıbeli’l-eb ceddesi ve tesviye-i umûruna mansûbe vasiyyesi ve zevce-i mezbûre Siyore’nin tarafından husûs-ı âti’l-beyânda vekîl olduğu zât-ı mezbûreyi bi’l-ma‘rifeti’ş-şer‘iyye ârifân olan Panayot v. Dimitri ve Todori v. Yanaki nâm zimmîler şehâdetleriyle vekâleti sâbit olan mezbûre Susane nâm Nasrâniye meclis-i ma‘kūd-ı mezkûrda hâlik-i mezbûrun hayâtında şerîki ve veresesine îsâle vasîsi olan işbu râfiʻü’s-sifr Panayot v. Nikola nâm zimmî muvâcehesinde bi’l-verâse ve’l-vesâye ve’l-vekâle ikrâr-ı tâm ve takrîr-i kelâm edip hâlik-i mezbûrun terekesi tahrîr ve ba‘de ihrâci’l-mesârif ve’d-düyûn ber-mûceb-i defter-i kassâm tashîh-i merkūm üzere hissemize isâbet eden yirmi sekiz bin altı yüz seksen akçeyi terekeden olmak üzere vasiyy-i merkūm Panayot zimmî bana def‘ ve teslîm ben dahi ber-vech-i muharrer meblağ-ı mezbûru yedinden bi’l-verâse ve’l-vesâye ve’l-vekâle bi-kadri’l-hısas bi’t-tamam ahz u kabz edip baʻde’l-yevm oğlum hâlik-i mezbûrun terekesine müte‘allika âmme-i da‘vâdan merkūm Panayot zimmînin zimmetini bi’l-verâse ve’l-vekâle ibrâ-i âmm-ı kātıʻu’n-nizâ‘la ibrâ ve ıskāt edip vechen mine’l-vücûh ve sebeben mine’l-esbâb katʻâ da‘vâ ve nizâ‘ım yokdur dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb u tahrîr, ba‘dehû ma‘an baʻs olunan ümenâ-i şer‘le meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’r-râbiʻ aşer min-Saferi’l-hayr li-sene semân ve hamsîn ve mi’e ve elf. Şuhûdü’l-hâl: Bezzâz el-Hâc Mehmed Ağa b. el-Hâc Hüseyin, el-Hâc Hasan b. Abdullah, Ahmed Ağa b. Mehmed, Hâfız İbrahim Efendi b. Musa, Ahmed Ağa b. Mustafa. Kika v. Zota, Kanila v. İstemaki, Panayot v. Dimitri, Dimo v. Berko, İstemaki v. Panayot, Todori v. İstemaki, Yanaki v. Panayot, Nikola v. Siyani.