Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 428 Hüküm no: 508 Orijinal metin no: [67b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Bayram’ın iki at sakası kırbasını el-Hâc Muharrem b. Hasan’a sattığı Dârü’l-hilâfeti’l-aliyye Kostantıniyye el-mahmiyye mahallâtından Ayasofya-i Kebîr mahallesi ahâlîsinden olup at sakası tâifesinden olan Ahmed b. Bayram nâm kimesne meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda işbu bâ‘isü’l-kitâb el-Hâc Muharrem b. Hasan nâm kimesne mahzarında bi’t-tav‘i’s-sâf ikrâr ve i‘tirâf edip Ayasofya-i Kebîr kurbunda vâki‘ Çukurçeşme’de mutasarrıf olduğum bir at sakası ki yeğeni mezbûr el-Hâc Muharrem’e meccânen bey‘ ve tefvîz edip ol dahi tefevvuz ve kabûl ettikden sonra silk-i mülk-i sahîhimde münselik olan iki at sakası kırbasını dahi on iki kıt‘a esedî guruşa merkūm el-Hâc Muharrem’e bey‘ ve teslîm edip ol dahi iştirâ ve kabûl ve tesellüm eyledikden sonra semen-i mezbûr on iki kıt‘a esedî guruşu merkūm el-Hâc Muharrem yedinden tamâmen ahz u kabz eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Recebi’l-mürecceb li sene seb‘a ve seb‘în ve elf. Şuhûdü’l-hâl: Kârhâneli Ali Bey [b.] Ahmed, Mehmed Beşe b. Osman Sakacı?, İsa Beşe b. Hüseyin, Mahmud b. Ahmed, Şaban b. Musli, Âlî Mahmud b. Mehmed, Rıdvan Bey.