Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 87 Hüküm no: 38 Orijinal metin no: [11a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Abdülkadir Ağa’nın vefâtıyla oğlu Seyyid Mahmud’a amcası Seyyid Abdülhalim Ağa’nın vasi tayin edilmesi Havâss-ı Refîʻa kazâsına tâbi‘ Ağaçlı nâm karyede sâkin iken bundan akdem vefât eden es-Seyyid Abdulkādir Ağa b. es-Seyyid Ömer Efendi’nin sulbî sagīr oğlu es-Seyyid Mahmud’un tesviye-i umûruna kıbel-i şer‘den bir vasî nasbı lâzım ve mühim olmağın emânet ile ma‘rûf ve diyânet ile mevsûf her vechile vesâyet uhdesinden gelmeğe kādir idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan sagīr-i mezbûrun ammisi işbu râfiʻü[‘l-kitâb] es-Seyyid Abdülhalim Ağa b. es-Seyyid Ömer Efendi’yi hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīr-i mezbûrun tesviye-i umûruna vasî nasb u ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımesin kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’r-râbiʻ ve’l-ışrîn min-Muharremi’l-harâm li-sene semân ve hamsîn ve mi’e ve elf. Şuhûdü’l-hâl: es-Seyyid ( ) Ağa b. Mustafa, Ali Çavuş b. Mehmed, Ahmed Beşe b. Abdullah, Ahmed Beşe b. Ahmed, Hüseyin Ağa b. Hasan ve gayruhum.