Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 88 Hüküm no: 40 Orijinal metin no: [11b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostanî Hüseyin Bey’in, vasisi olduğu kızı Emetullah’a annesinden intikal eden mirasdan nafaka tayin edilmesini istemesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de el-Hâc Hüsrev Mahallesiʼnde sâkine iken bundan akdem vefât eden Ümmühani Hatun bt. Halil’in sadriye sagīre kızı Emetullah’ın babası ve tesviye-i umûruna vasîsi olan işbu râfiʻü’l-kitâb Bostanî Hüseyin Bey b. Abdullah meclis-i şer‘-i şerîf-i enverde takrîr-i kelâm ve tâʻbir ani’l-merâm edip vasîsi olduğum sagīre-i mezbûrenin nafaka ve kisve-bahâya eşedd-i ihtiyâcı olmağla vâlidesi müteveffât-ı mezbûreden müntakil mâl-ı mevrûsundan kadr-i ma‘rûf ve kisve-bahâ farz ve takdîr olunmak matlûbumdur dedikde vasiyy-i mezbûrun kelimât-ı meşrûhu vâkıʻa mutâbık idiği zeyl-i kitâbda muharrerü’l-esâmî ihbârıyla lede’ş-şer‘i’l-enver zâhir ve mukarrer olmağın hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīre-i mezbûrenin vâlidesi müteveffât-ı mezbûre[den] müntakil mâl-ı mevrûsundan beher yevm on ikişer akçe nafaka ve kisve-bahâ farz ve takdîr buyurup meblağ-ı mefrûz-ı mezbûru sagīre-i mezbûrenin nafaka ve kisve-bahâsına harc u sarfa ve lede’l-iktizâ istidâneye ve inde’z-zafer mâlına rücû‘a vasiyy-i mezbûra izin vermeğin mâ-vaka‘a bi’t-taleb ketb olundu. Fi’l-yevmi’l-hâmis aşer min-Saferi’l-hayr li-sene semân ve hamsîn ve mi’e ve elf. Şuhûdü’l-hâl: Hâfız el-Hâc Mehmed Efendi b. Mehmed İmâm-ı mahalle-i mezbûr, Numan Çelebi b. İbrahim, Süleyman Beşe b. Hüseyin, Ahmed Çelebi b. Mehmed, es-Seyyid Mehmed b. es-Seyyid Mustafa.