Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 88 Hüküm no: 41 Orijinal metin no: [11b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil b. Mehmed’in Vâlidesarayı Ortası neferatına vakfettiği paranın terekesinden verilmesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de vâki‘ Vâlide Sarayı Ortası neferâtına mevkūfe nukūdun mütevellîsi olan işbu râfiʻü’l-kitâb Bölükbaşı Ahmed Bey b. Mustafa nâm kimesne meclis-i şer‘-i şerîf-i enverde bahçe-i mezbûre neferâtından olup bundan akdem vefât eden Halil b. Mehmed’in vâlidesi ve hasren vârisi ve terekesine bi’l-verâse vâzıʻatü’l-yed olup zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Âişe bt. Abdullah nâm hatun mahzarında bi’t-tevliye ikrâr-ı tâm ve takrîr-i kelâm edip müteveffâ-i mezbûr Halil b. Mehmed b. Abdullah hâl-i hayâtında ve kemâl-i akl [u] sıhhatinde sülüs mâlından saray-ı mezbûr neferâtı ortasına yirmi guruş vasiyyet etmekle mezbûre Âişe Hatun vasiyyet-i mezbûreyi mücîze olup meblağ-ı mezbûru bana def‘ ve teslîm, ben dahi ber-vech-i muharrer merkūme Âişe Hatun’un bi’t-tevliye yedinden bi’t-tamam ve’l-kemâl ahz u kabz eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-ışrîn min-Saferi’l-hayr li-sene semân ve hamsîn ve mi’e ve elf min-hicreti men lehü’l-izzü ve’ş-şeref. Şuhûdü’l-hâl: Subaşı Abdullah Ağa b. ( ), Bayrakdâr Mehmed Beşe b. ( ), es-Seyyid Hüseyin b. ( ), Petnehorlu Ali Beşe b. ( ), Bölükbaşı Mehmed Çelebi b. ( ), es-Seyyid Mehmed b. es-Seyyid Mustafa, Hüseyin Çelebi b. Mehmed, es-Seyyid Ömer Beşe b. ( ) ve gayruhum.