Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 100 Hüküm no: 54 Orijinal metin no: [14b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alime Hatun’un vefât etmeden önce birtakım eşyalarını küçük kızı Fâtıma’ya hibe etmiş olduğu Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Defterdâr Kara Süleyman Mahallesiʼnde sâkine iken bundan akdem vefât eden Alime Hatun bt. Osman’ın verâseti zevc-i metrûku Derviş Mehmed b. Mahmud ile sadriye sagīre kızı Fâtıma’ya ve li-ebeveyn er karındaşı Mustafa’ya ve li-ebeveyn er karındaşı olup vilâyet-i Anadolu’da Kastamonu kazâsında sâkin Mehmed’e münhasıra olduğu şer‘an zâhir ve müteʻayyen oldukdan sonra sagīre-i mezbûrenin babası olup tesviye-i umûruna bâ-hüccet-i şer‘iyye mansûb vasîsi olan işbu râfiʻü’l-kitâb mezbûr Derviş Mehmed meclis-i şer‘-i şerîf-i enverde merkūm Mehmed’in hisse-i irsiyyesini ahz u kabz, zabt u hıfza kıbel-i şer‘den <> vasî ve kayyım nasb olunmağla tereke-i müteveffâ-i mezbûra bi’l-verâse ve bi’l-vesâye vaz‘-ı yed eden mezbûr Mustafa mahzarında üzerine da‘vâ ve takrîr-i kelâm edip zevcem müteveffât-ı mezbûre Alime Hatun bt. Osman b. Abdullah hayâtında fevtinden üç ay mukaddem bir buçuk seneden berü maraz-ı müzmineye mübtelâ olduğu hâlde hâline tağyîr gelmeksizin eşyâ-i memlûkesinden işbu muʻâyene ve müşâhede olunan ber-mûceb-i defter-i müfredât iki minder ve dört kadife yasdık ve iki yemenî yasdık ve üç hamam tası ve bir sini ve üç tencere ve iki kapak ve üç demir saç ve iki tâbe ve bir lengerî ve üç kahve ibriği ve bir yeşil çuka ferâce ve bir kırmızı çuka biniş ve bir hâre cübbe ve bir sim kuşak ve iki baş yemenîsi ve bir kutnî anteri ve bir kutnî şalvar ve bir beyâz şalvar ve iki köhne alaca anteri ve bir beyâz anteri ve bir yeşil çuka kürk ve beş yemenî yorgan ma‘a çarşeb ve iki döşek çarşebi ve üç beledî döşek ile nakid elli beş guruşu vasîsi olduğum kızı sagīre-i mezbûre için Fâtıma’ya huzûr-ı Müslimîn’de hibe ve temlîk ve velâyeten bana def‘ ve teslîm, ben dahi meclis-i hibede sagīre-i mezbûre için bi’l-velâye ittihâb ve kabûl ve kabz edip ol vechile sagīre-i mezbûrenin mülk-i mevhûbesi olmuş iken merkūm Mustafa bi-gayr-ı hakkın vaz‘-ı yed eder, suâl olunup kasr-ı yedine tenbîh olunmak matlûbumdur dedikde gıbbe’s-suâl merkūm Mustafa cevâbında eşyâ-i muharrere-i mezkûra vaz‘-ı yedini ikrâr lâkin müdde‘î-i mezbûrun ber-vech-i muharrer müddeʻâsını inkâr edicek, müdde‘î-i mezbûrdan müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den mahalle-i mezbûrede sâkin İmâm Ali Efendi b. Mehmed ve es-Seyyid Hasan Ağa Zaʻîm b. es-Seyyid Ahmed ve Mustafa Çelebi b. Hasan nâm kimesneler li-ecli’ş-şehâde meclis-i şer‘a hâzirûn olup isre’l-istişhâd fi’l-hakīka şahsı rü’yetimiz ile ma‘lûmumuz olan müteveffât-ı mezbûre Alime Hatun bt. Osman b. Abdullah hayâtında fevtinden üç ay mukaddem bir buçuk seneden berü maraz-ı müzmineye mübtelâ olduğu hâlde hâline tağyîr gelmeksizin eşyâ-i memlûkesinden işbu muʻâyene ve müşâhede olunan ber-mûceb-i defter-i müfredât iki minder ve dört kadife yasdık ve iki yemenî yasdık ve üç hamam tası ve bir sini ve üç tencere ve iki kapak ve üç demir saç ve iki tâbe ve bir lengerî ve üç kahve ibriği ve bir yeşil çuka ferâce ve bir kırmızı çuka biniş ve bir hâre cübbe ve bir sim kuşak ve iki baş yemenîsi ve bir kutnî anteri ve bir kutnî şalvar ve bir beyâz şalvar ve iki köhne alaca şâlî anteri ve bir beyâz anteri ve bir yeşil çuka kürk ve beş yemenî yorgan ma‘a çarşeb ve iki döşek çarşebi ve üç beledî döşek ile nakid elli beş guruşu işbu müdde‘î-i mezbûr Derviş Mehmed’in vasîsi olduğu kızı sagīre-i mezbûre Fâtıma’ya bizim huzûrumuzda hibe ve temlîk ve velâyeten mezbûr Derviş Mehmed’e def‘ ve teslîm, ol dahi ber-vech-i muharrer meclis-i hibede sagīre-i mezbûre için bi’l-velâye ittihâb ve kabûl ve kabz edip eşyâ-i muharrere-i mezkûre ile nakd-i merkūm sagīre-i mezbûre Fâtıma’nın mevhûbesi olmuşdur, bizler bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-taʻdîl ve’t-tezkiye şehâdetleri makbûle olmağın mûcebiyle baʻde’l-hükm mâ-vaka‘a bi’t-taleb ketb olundu. Fi’l-yevmi’l-hâmis min-şehri Rebîʻi’l-âhir li-sene semân ve hamsîn ve mi’e ve elf min-hicretin men lehü’l-izzü ve’s-saʻâdetü ve’ş-şeref. Şuhûdü’l-hâl: Es-Seyyid Ahmed Ağa b. es-Seyyid Mehmed, es-Seyyid Mustafa Efendi b. es-Seyyid Ahmed, Tâcir el-Hâc Ahmed Ağa, Mustafa Efendi b. Hüseyin, Ahmed Efendi b. Mustafa, es-Seyyid Feyzullah Ağa.