Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 102 Hüküm no: 55 Orijinal metin no: [15a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Londiri v. Yorgo’nun miras ev ve bağdaki hissesine el koyan Hırsafiye bt. Yorgaki’den hakkını almak istemesi Havâss-ı Refîʻa kazâsı muzâfâtından Çekmece-i Kebîr nâhiyesine tâbi‘ Bigados karyesinde mütemekkin işbu râfiʻü’s-sifr Londiri v. Yorgo nâm zimmî meclis-i şer‘-i şerîf-i enverde zikri âtî menzil ile kürûmî mülk bir kıt‘a bağa vâzıʻatü’l-yed olduğu müteʻayyen olan Hırsafiye bt. Yorgaki tarafından vekîl-i sâbitü’l-vekâlesi karındaşı Asanaki v. Yorgaki nâm zimmî muvâcehesinde üzerine da‘vâ ve takrîr-i kelâm edip karye-i mezbûrede vâki‘ bir tarafdan Papa Yanaki mülkü ve bir tarafdan Yorgi mülkü ve bir tarafdan Yamandi oğlu mülkü ve bir tarafdan tarîk-i âm ile mahdûd fevkānî bir bâb odayı müştemil mülk menzil ile yine karye-i mezbûre bâgātında vâki‘ bir tarafdan Dimitri bağı ve bir tarafdan Papa Navazoğlu bağı ve bir tarafdan Kosta bağı ve bir tarafdan tarîk-i âm ile mahdûd bir kıt‘a kürûmî mülk bağ bundan akdem hâlik olan Tanaş ve Londiri zimmînin ile’l-helâk mülk[ü] olup ba‘de helâkihî zevce-i metrûkesi mesfûre Hırsafiye ile sulbiye sagīre kızı Ezmarağda’ya ve li-ebeveyn kız karındaşları Afnedo? ve Esmine’ye? ve anası Rakine’ye? müntakil mevrûs oldukdan sonra sagīre-i mesfûre Ezmarağda hâlike olup verâseti anası mesfûre Hırsafiye[‘ye] münhasıra ba‘dehâ mesfûre Esmine? Nasrâniye dahi hâlike olup verâseti anası mezbûre Rakine’ye? ve li-ebeveyn kız karındaşı mesfûre Afnedo? dahi hâlike olup verâseti sulbî oğlu olduğum vechile bana münhasıra olmağla tereke-i evvel-i mezbûrdan menzil ile kürûmî mülk bağdan bi-hükmi’l-münâsahati’ş-şer‘iyye kırk sekiz sehmden benim hisseme isâbet eden on sekiz sehm hisse-i irsiyyeme mesfûre Hırsafiye Nasrâniye bi-gayr-ı hakkın vaz‘-ı yed eder, suâl olunup kasr-ı yedine tenbîh olunmak matlûbumdur dedikde gıbbe’s-suâl ve’l-inkâr müdde‘î-i mesfûrdan müdde‘âsını mübeyyine beyyine taleb olundukda udûl-ı Nasârâ’dan olup karye-i mezbûre ahâlîsinden Kiryazi v. Dimitraki ve Piro v. Yorgo nâm zimmîler li-ecli’ş-şehâde meclis-i şer‘de hâzırân olup isre’l-istişhâd fi’l-hakīka karye-i mezbûrede vâki‘ bir tarafdan Papa Yanaki mülkü ve bir tarafdan Yorgi mülkü ve bir tarafdan Yamandi oğlu mülkü ve bir tarafdan tarîk-i âm ile mahdûd fevkānî bir bâb odayı müştemil mülk menzil ile yine karye-i mezbûre bâgātında vâki‘ bir tarafdan Dimitri bağı ve bir tarafdan Papa Navazoğlu bağı ve bir tarafdan Kosta bağı ve bir tarafdan tarîk-i âm ile mahdûd bir kıt‘a kürûmî mülk bağı bundan akdem hâlik olan Tanaş v. Andersi zimmînin ile’l-helâk mülk olup ba‘de helâkihî zevce-i metrûkesi mesfûre Hırsafiye ile sulbiye sagīre kızı Ezmarağda’ya ve li-ebeveyn kız karındaşı Afnedo? ve Esmine’ye? ve anası Rakine’ye? müntakil mevrûs oldukdan sonra sagīre-i mezbûre Ezmarağda hâlike olup verâseti anası mesfûre Hırsafiye[‘ye] münhasıra ba‘dehâ mesfûre Esmine? dahi hâlike olup verâseti anası mezbûre Rakine’ye? ve li-ebeveyn kız karındaşı mesfûre Afnedo? dahi hâlike olup verâseti sulbî oğlu işbu müdde‘î-i mezbûr Londiri zimmîye münhasıra olmağla tereke-i evvel-i mesfûrdan müntakil sâlifü’z-zikr menzil ve bağ müdde‘î-i mesfûr Londiri ve mesfûre Hırsafiye’nin ber-vech-i muharrer mülk-i mevrûslarıdır, bizler bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de riʻâyeti şerâiti’l-kabûl şehâdetleri makbûle olmağın mûcebiyle baʻde’l-hükm ve sâlifü’z-zikr menzil ile bağdan ber-mûceb-i tashîh kırk sekiz sehmden müdde‘î-i mesfûr Londiri zimmînin hissesine isâbet eden on sekiz sehm hisse-i irsiyyesinden kasr-ı yed etmek üzere müvekkile-i mesfûrenin vekîl-i mesfûr Asanaki zimmîye tenbîh-birle mâ-vaka‘a bi’t-taleb ketb olundu. Fi’l-yevmi’s-sâdis min-şehri Rebîʻi’l-âhir li-sene semân ve hamsîn ve mi’e ve elf. Şuhûdü’l-hâl: İbrahim Çavuş b. Hüseyin, es-Seyyid Mehmed b. es-Seyyid Mustafa, Hüseyin Çelebi b. Mehmed, Mehmed Çelebi b. Abdullah, Musa Bey Muhzır, es-Seyyid Ahmed b. es-Seyyid Mehmed.