Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 103 Hüküm no: 56 Orijinal metin no: [15a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alime Hatun’un vârislerine taksim edilen terekesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Defterdâr Kara Süleyman Mahallesiʼnde sâkine iken bundan akdem vefât eden Alime Hatun bt. Osman’ın verâseti zevc-i metrûku Derviş Mehmed ile sadriye sagīre kızı Fâtıma’ya ve li-ebeveyn er karındaşı Mustafa’ya ve li-ebeveyn er karındaşı olup vilâyet-i Anadolu’da Kastamonu kazâsında sâkin Mehmed’e münhasıra olduğu şer‘an zâhir ve müteʻayyen oldukdan sonra sagīre-i mezbûrenin babası ve tesviye-i umûruna bâ-hüccet-i şer‘iyye mansûb vasîsi olan mezbûr Derviş Mehmed ile kezâlik merkūm Mehmed’in hisse-i irsiyyesini ahz u kabz, zabt u hıfza kıbel-i şer‘den vasî ve kayyım nasb olunan merkūm Mustafa taleb ve ma‘rifetiyle tahrîr ve taksîm olunan tereke-i müteveffâ-i mezbûredir ki ber-vech-i âtî zikr olunur. Fi’l-yevmi’l-hâmis min-Rebîʻülâhir sene semân ve hamsîn ve mi’e ve elf. #&# Mehr-i müeccel der-zimmet-i zevcü’l-mezbûr 1.920 akçe Der-zimmet-i karındaşı oğlu Seyyid Mehmed 720 akçe Der-zimmet-i karındaşı mezbûr Mustafa 220 akçe Cem‘an yekûn: 2.860 akçe. #&# Minhâ el-ihrâcât: Iskāt-ı salât ber-mûceb-i vasiyyet 500 akçe Resm-i âdî 60 akçe Kalemiye ve hüddâmiye 45 akçe Kaydiye-i defter ve hüccet-i vasî 15 akçe Yekûnü’l-mesârif: 620 akçe. Yalnız altı yüz yirmi akçedir. Sahhe’l-bâkī li’t-taksîm beyne’l-verese, meblağ: 2.240. Yalnız iki bin iki yüz kırk akçedir. Hissetü’z-zevci’l-mezbûr 560 akçe Hissetü’l-binti’l-mezbûr 1.170 akçe Hissetü’l-ahi’l-mezbûr 255 akçe Hissetü’l-ahi’l-mezbûr 255 akçe Müteveffât-ı mezbûre Alime Hatun hayâtında sadriye sagīre kızı mezbûre Fâtıma’ya hibe ve temlîk edip sagīre-i mezbûrenin babası ve tesviye-i umûruna bâ-hüccet-i şer‘iyye mansûb vasîsi olan mezbûr Derviş Mehmed’e teslîm olunan eşyâdır ki ber-vech-i âtî zikr olunur. [15b] Yemenî yasdık, 2 240 akçe Yemenî yorgan ma‘a çarşeb, 5 1.200 akçe Döşek çarşebi, 2 160 akçe Beledî döşek, 3 600 akçe Minder, 2 480 akçe Köhne kadife yasdık yüzü, 4 60 akçe Tencere bâ-kapak, 2 300 akçe Def‘a tencere, 1 120 akçe Demir saç ayak 12 akçe Def‘a demir saç ayak 40 akçe Tâbe, 2 180 akçe Sahan, 3 150 akçe Lengerî 15 akçe Hamam tası 100 akçe Sini, 1 210 akçe Kahve ibriği, 3 120 akçe Yeşil çuka ferâce, 1 920 akçe Kırmızı çuka biniş 150 akçe Hâre cübbe, 1 480 akçe Sim kuşak, 1 720 akçe Baş yemenîsi, 2 520 akçe Kutnî anteri 300 akçe Kutnî şalvar, 1 150 akçe Beyâz köhne şalvar, 1 60 akçe Alaca şâlî anteri, 2 240 akçe Beyâz anteri, 1 120 akçe Yeşil çuka kürk 300 akçe Nukūd, akçe 6.600 akçe Cem‘an yekûn: 14.547 akçe. Derûn-ı defterde mezkûr eşyânın kıymeti ile nakid yalnız on dört bin beş yüz kırk yedi akçe olup zikr olunan eşyâ ile nakd-i mezbûru vasiyy-i merkūm Derviş Mehmed’e teslîm olunduğu işbu mahalle şerh verildi.