Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 105 Hüküm no: 57 Orijinal metin no: [15b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha Hatun’un vefâtıyla küçük kızı Fâtıma’ya babasının vasi tayin edilmesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Davud Ağa Mahallesiʼnde sâkine iken bundan akdem vefât eden Sâliha Hatun bt. Abdullah’ın sadriye sagīre kızı Fâtıma’nın tesviye-i umûruna kıbel-i şer‘den bir vasî nasbı lâzım ve mühim olmağın sagīre-i mezbûrenin babası olup mahmûdü’l-hâl idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan işbu râfiʻü’l-kitâb el-Hâc Yusuf b. Abdullah’ı hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīre-i mezbûrenin tesviye-i umûruna vasî nasb u ta‘yîn buyurduklarında ol dahi ber-vech-i muharrer vesâyet-i mezbûru kabûl ve hizmet-i lâzımesin kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’s-sâdis aşer min-Rebîʻülâhir li-sene semân ve hamsîn ve mi’e ve elf. Şuhûdü’l-hâl: Mahmud Ağa b. el-Hâc Mehmed, Mustafa Ağa b. Yusuf, Feyzullah Çelebi b. Ali, Salih Çelebi b. Hüseyin, Ali Efendi b. Abdullah ve gayruhum.