Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 105 Hüküm no: 58 Orijinal metin no: [15b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha Hatun’un mevrûs malından küçük kızı Fâtıma’ya nafaka tahsis edilmesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Davud Ağa Mahallesiʼnde sâkine iken bundan akdem vefât eden Sâliha Hatun bt. Abdullah’ın sadriye sagīre kızı Fâtıma’nın babası ve tesviye-i umûruna vasîsi olan işbu râfiʻü’l-kitâb el-Hâc Yusuf Ağa b. Abdullah nâm kimesne meclis-i şer‘-i şerîf-i enverde takrîr-i kelâm ve tâʻbir ani’l-merâb edip vasîsi olduğum sagīre-i mezbûrenin nafaka ve kisve-bahâya eşedd-i ihtiyâcı olmağla vâlidesi müteveffât-ı mezbûreden müntakil mâl-ı mevrûsundan kadr-i ma‘rûf nafaka ve kisve-bahâ farz ve takdîr buyrulmak matlûbumdur dedikde vasiyy-i mezbûrun kelimât-ı meşrûhası vâkıʻa mutâbık idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīre-i mezbûrenin vâlidesi müteveffât-ı mezbûreden müntakil mâl-ı mevrûsundan beher yevm dörder para nafaka ve kisve-bahâ farz ve takdîr buyurup meblağ-ı mefrûz-ı mezbûru sagīre-i mezbûrenin nafaka ve kisve-bahâ farz ve takdîr buyurup meblağ-ı mefrûz-ı mezbûru sagīre-i mezbûrenin nafaka ve kisve-bahâsına harc u sarf ve lede’l-iktizâ istidâneye ve inde’z-zafer mâlına rücû‘a vasiyy-i mezbûra izin vermeğin mâ-vaka‘a bi’t-taleb ketb olundu. Fi’l-yevmi’s-sâdis aşer min-Rebîʻülâhir li-sene semân ve hamsîn ve mi’e ve elf. Şuhûdü’l-hâl: Mahmud Ağa b. el-Hâc Mehmed, Mustafa Ağa b. Yusuf, Feyzullah Çelebi b. Ali, Salih Çelebi b. Hüseyin, Ali Efendi b. Abdullah.