Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 106 Hüküm no: 59 Orijinal metin no: [15b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha Hatun’un vârislerinin terekedeki hisselerini almaları Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Zal Paşa Mahallesiʼnde sâkine iken bundan akdem vefât eden Sâliha Hatun bt. Abdullah’ın verâseti zevc-i metrûku Mollâ Osman b. Mustafa ile kendüyü âzâd eden Mehmed Bey b. Ahmed Paşa’ya münhasıra olduğu şer‘an zâhir ve müteʻayyen oldukdan sonra mezbûr Mehmed Bey tarafından husûs-ı âti’l-beyâna vekîl olduğu Ali Çelebi b. Mehmed ve Mehmed Ağa b. Mustafa nâm kimesneler şehâdetleriyle şer‘an sâbit ve sübût-ı vekâletine hükm-i şer‘î lâhık olan Mustafa Efendi b. ( ) meclis-i şer‘-i şerîf-i enverde müteveffât-ı mezbûrenin zevci ve terekesine bi’l-verâse vâzıʻu’l-yed olan işbu râfiʻü’l-kitâb mezbûr Mollâ Osman mahzarında bi’l-vekâle ikrâr-ı tâm ve takrîr-i kelâm edip müteveffât-ı mezbûrenin terekesinden müvekkilim mûmâ-ileyh Mehmed Bey’e on iki guruş isâbet etmekle meblağ-ı mezbûru merkūm Mollâ Osman bana def‘ ve teslîm, ben dahi ber-vech-i muharrer meblağ-ı mezbûru yedinden bi’l-vekâle ahz u kabz eyledim, meblağ-ı mezbûrdan merkūm Mollâ Osman yedinde ve zimmetinde bir akçe ve bir habbe bâkī kalmayıp baʻde’l-yevm müteveffât-ı mezbûrenin terekesine müte‘allika âmme-i mîrâs da‘vâsından merkūm Mollâ Osman’ın zimmetini bi’l-vekâle ibrâ ve ıskāt eyledim vechen mine’l-vücûh ve sebeben mine’l-esbâb müvekkilim mûmâ-ileyhin katʻâ da‘vâsı ve nizâ‘ı yokdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbiʻ min-Rebîʻülâhir sene semân ve hamsîn ve mi’e ve elf. Şuhûdü’l-hâl: Es-Seyyid Mehmed b. es-Seyyid Mustafa, Ahmed Efendi b. Mustafa, Mustafa Efendi b. Hüseyin, es-Seyyid Ahmed b. es-Seyyid Mehmed.