Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 106 Hüküm no: 60 Orijinal metin no: [15b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun’un kocasından kalan evin kendisine ait olduğunu ispatlaması Husûs-ı âti’l-beyânın mahallinde istimâ‘ ve tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Servi Mahallesiʼnde sâkin iken bundan akdem vefât eden Dergâh-ı Âlî -dâme mahfûfen bi’l-maʻâlî- yeniçerilerinin kırk sekizinci cemâʻat [16a] odasının mütekāʻidlerinden Timişvarî el-Hâc Hüseyin b. Hasan’ın hayâtında sâkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde müteveffâ-i mezbûrun zevce-i menkûha-i metrûkesi olup zâtı ta‘rîf-i şer‘î ile mu‘arrefe olan râfiʻatü’l-kitâb Fâtıma Hatun bt. Hüseyin meclis-i ma‘kūd-ı mezkûrda zikri âtî menzile bi’l-emâne vaz‘-ı yed eden mahmiye-i İstanbul’da hâlâ yeniçeri beytülmâlı emîni olan fahrü’l-akrân Hasan Ağa b. Abdullah tarafından husûs-ı âti’l-beyânda vekîl olduğu Ali Ağa b. Mehmed ve İsmail Efendi b. Mustafa şehâdetleriyle şer‘an sâbit ve sübût-ı vekâletine hükm-i şer‘î lâhık olan hâlâ beytülmâl nâzırı Hüseyin Ağa b. Ahmed mahzarında üzerine da‘vâ ve takrîr-i kelâm edip ve zevcim müteveffâ-i mezbûr el-Hâc Hüseyin b. Hasan b. Abdullah’ın yedinde mülk ve hakkı olduğu hâlde mahalle-i mezbûrede vâki‘ bir tarafdan İsmail Çavuş Ağa mülkü ve bir tarafdan Mustafa Beşe mülkü ve bir tarafdan Mehmed Odabaşı mülkü ve bir tarafdan tarîk-i âm ile mahdûd bir bâb fevkānî oda ve bir sofa ve bir su kuyusu ve bir matbah ve bir kenîf ve bir mikdâr bağçeyi muhtevî mülk menzili bin yüz elli üç senesi Recebi’l-müreccebʼin yirmi yedinci günü zevcim müteveffâ-i mezbûr el-Hâc Hüseyin huzûr-ı Müslimîn’de seksen guruşa bana beyʻ ve temlîk ve teslîm, ben dahi ber-vech-i muharrer iştirâ ve temellük ve tesellüm ve kabûl ve kabz eylediğimden sonra semen olan meblağ-ı mezbûr seksen guruş mütâlebesinden benim zimmetimi ibrâ ve ıskāt edip ol vechile benim mülk-i müşterâm olmuş iken vekîl-i mezbûr Hüseyin Ağa menzil-i mezkûru beytülmâl olmak üzere bi-gayr-ı hakkın vaz‘-ı yed eder, suâl olunup kasr-ı yedine tenbîh olunmak matlûbumdur dedikde gıbbe’s-suâl vekîl-i mezbûr bi’l-emâne menzil-i mahdûd-ı mezkûra vaz‘-ı yedini ikrâr lâkin müdde‘iye-i mezbûrenin ber-vech-i muharrer müddeʻâsını inkâr edicek, müdde‘iye-i mezbûre Fâtıma Hatun’dan müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den mahalle-i mezbûre sâkinlerinden Ömer Efendi b. Ali ve Ali Beşe b. Mustafa nâm kimesneler li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-i mezbûr el-Hâc Hüseyin b. Hasan b. Abdullah’ın yedinde mülk ve hakkı olduğu hâlde mahalle-i mezbûrede vâki‘ bir tarafdan İsmail Çavuş Ağa mülkü ve bir tarafdan Mustafa Beşe mülkü ve bir tarafdan Mehmed Odabaşı mülkü ve bir tarafdan tarîk-i âm ile mahdûd bir bâb fevkānî oda ve bir sofa ve bir su kuyusu ve bir matbah ve bir kenîf ve bir mikdâr bağçeyi muhtevî mülk menzili bin yüz elli üç senesi Recebi’l-müreccebin yirmi yedinci günü müteveffâ-i mezbûr el-Hâc Hüseyin zevcesi işbu müdde‘iye-i mezbûre Fâtıma Hatun’a bizim huzûrumuzda seksen guruşa beyʻ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabûl ve kabz eylediğinden sonra semen olan meblağ-ı mezbûr seksen guruş mütâlebesinden zevcesi mezbûre Fâtıma Hatun’un zimmetini ibrâ ve ıskāt edip ol vechile müdde‘iye-i mezbûrenin mülk-i müşterâsı olmuşdur, bizler bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-taʻdîl ve’t-tezkiye şehâdetleri makbûle olmağın mûcebiyle baʻde’l-hükm vâki‘ hâli mevlânâ-yı mezbûr mahallinde ketb u tahrîr ba‘dehû ma‘an baʻs olunan ümenâ-i şer‘le meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâlis min-Rebîʻülâhir li-sene semân ve hamsîn ve mi’e ve elf. Şuhûdü’l-hâl: Ömer Efendi b. ( ), İsmail Beşe b. ( ), İsmail Ağa b. ( ), Mehmed Çelebi b. ( ), es-Seyyid Mehmed Çelebi b. es-Seyyid Mustafa, Ahmed Efendi.