Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 109 Hüküm no: 62 Orijinal metin no: [16b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin adlı çocuğa dayısı el-Hâc Hüseyin Ağa b. Mehmed’in vasi tayin edilmesi Mahmiye-i İstanbul’da Kabasakal Mahallesiʼnde sâkin iken bundan akdem vefât eden Hâfız Mehmed b. Mehmed’in usûbet-i nesebiyye cihetinden li-ebeveyn ammi oğlu olup vilâyet-i Anadolu’da Apolyont kazâsına tâbi‘ Bola? karyesinde sâkin Hüseyin nâm sagīrin tesviye-i umûruna kıbel-i şer‘den bir vasî nasbı lâzım ve mühim olmağın emânet ile ma‘rûf ve diyânet ile mevsûf her vechile vesâyet uhdesinden gelmeğe kādir idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan işbu râfiʻü’l-kitâb sagīr-i mezbûrun hâli el-Hâc Hüseyin Ağa b. Mehmed’i hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīr-i mezbûrun tesviye-i umûruna vasî nasb u ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımesin kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’l-hâdî ve’l-ışrîn min-Rebîʻülâhir sene semân ve hamsîn ve mi’e ve elf. Şuhûdü’l-hâl: Abdurrahman Çelebi b. Ali Efendi, Mustafa Beşe b. Mehmed, Hasan Beşe b. Ahmed, es-Seyyid Mehmed b. es-Seyyid Mustafa, Hüseyin Çelebi b. Mehmed ve gayruhum.