Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 110 Hüküm no: 63 Orijinal metin no: [16b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Mehmed’in, kendisi ile kardeşi Ali’nin vefât eden Hafız Mehmed Efendi’nin vârislerinden olduklarını ispatlaması Mahmiye-i İstanbul’da Kabasakal Mahallesiʼnde sâkin iken bundan [akdem] vefât eden Hâfız Mehmed Efendi b. Mehmed’in ber-vech-i âtî usûbet-i nesebiyye cihetinden vârisi olduğunu iddiʻâ edip kendi tarafından asîl ve karındaşı Ali tarafından husûs-ı âti’l-beyânda vekîl-i sâbitü’l-vekâlesi olan işbu râfiʻü’l-kitâb Mustafa b. Mehmed nâm kimesne meclis-i şer‘-i şerîf-i enverde medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Kiremitçi Süleyman Mahallesiʼnde sâkin müteveffâ-i mezbûrun zevce-i menkûha-i metrûkesi ve zâtı ta‘rîf-i şer‘î ile mu‘arrefe olup tereke-i müteveffâ-i mezbûra bi’l-verâse vâzıʻu’l-yed olan Şerife Rukiye bt. es-Seyyid Mehmed mahzarında üzerine da‘vâ ve takrîr-i kelâm edip benim babam merkūm Mehmed’in babası Ahmed müteveffâ-i mezbûrun babası Mehmed ile li-ebeveyn karındaşlar olup babaları ismi Abdünnebi ve dedeleri ismi Abdullah ve anaları ismi Ünzile ve maskat-ı re’sleri vilâyet-i Anadolu’da Apolyont kazâsına tâbi‘ Bola? karyesi olup müteveffâ-i mezbûrun verâseti zevcesi mezbûre Şerife Rukiye Hatun ile usûbet-i nesebiyye cihetinden bana ve karındaşım müvekkil-i mezbûr Ali’ye ve işbu hâzır bi’l-meclis Hasan ve karındaşı sagīr Hüseyin b. Ahmed’e münhasıra ve tashîh-i meselesi on altı sehmden olup sihâm-ı mezbûreden dört sehmi zevcesi mezbûre Şerife Rukiye Hatun’a ve üç sehmi mezbûrûn Mustafa ve Ali ve Hasan ve sagīr Hüseyin’den herbirine isâbet etmekle müteveffâ-i mezbûra vâris ve terekesine bunlardan gayrı müstahikk-ı âhar olmamağla tashîh-i mezbûr üzere hisse-i irsiyyemizi bi’l-asâle ve bi’l-vekâle taleb eylediğimde mezbûr Şerife Rukiye Hatun vermede taʻallül eder, suâl olunsun dedikde gıbbe’s-suâl merkūme Şerife Rukiye Hatun cevâbında zevcim müteveffâ-i mezbûrun terekesine vâzıʻu’l-yed olduğum hâlde bundan akdem müteveffâ-i mezbûrun zî-rahm cihetinden vâris olmak üzere âmmetesi gāibe ani’l-meclis Sâliha nâm hatun vech-i şer‘î üzere kabz edip ancak zimmetimde yirmi beş guruş bâkī kalmışdır, lâkin müdde‘î-i mezbûr ber-vech-i muharrer müddeʻâsını inkâr edicek, müdde‘î-i mezbûrdan müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den sâlifü’z-zikr Bola? karyesi ahâlîsinden olup mahrûse-i Galata’ya tâbi‘ kasaba-i Tophane’de Cihangir Mahallesi’nde müsâfiren sâkin Mehmed Beşe b. Mehmed ve mahmiye-i İstanbul’da Ayasofya kurbünde Cebeciler başçavuşu menzilinde müsâfiren sâkin Mustafa b. el-Hâc Mehmed nâm kimesneler li-ecli’ş-şehâde meclis-i şer‘a hâzirûn olup isre’l-istişhâd fi’l-hakīka işbu müdde‘î-i mezbûr Mustafa’nın [17a] babası merkūm Mehmed’in babası Ahmed müteveffâ-i mezbûrun babası Mehmed ile li-ebeveyn karındaşlar olup babaları ismi Abdünnebi ve dedeleri ismi Abdullah ve anaları ismi Ünzile ve maskat-ı re’sleri vilâyet-i Anadolu’da Apolyont kazâsına tâbi‘ Bola? karyesi olup müteveffâ-i mezbûrun verâseti zevcesi mezbûre Şerife Rukiye Hatun ile usûbet-i nesebiyye cihetinden müdde‘î-i mezbûr Mustafa ve karındaşı müvekkil-i mezbûr Ali’ye ve işbu hâzır bi’l-meclis Hasan ve karındaşı sagīr-i mezbûr Hüseyin b. Ahmed’e münhasıra ve tashîh-i meselesi on altı sehmden olup sihâm-ı mezbûrdan dört sehmi zevcesi mezbûre Şerife Rukiye Hatun’a ve üç sehmi mezbûrûn Mustafa ve müvekkil Ali ve Hasan ve sagīr Hüseyin’den herbirine isâbet edip müteveffâ-i mezbûra bunlardan gayrı vâris ve terekesinde müstahikk-ı âhar olduğu ma‘lûmumuz değildir, bizler bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-taʻdîl ve’t-tezkiye şehâdetleri makbûle olmağın mûcebiyle baʻde’l-hükm mâ-vaka‘a bi’t-taleb ketb olundu. Fi’l-yevmi’l-hâdî ve’l-ışrîn min-Rebîʻülâhir sene semân ve hamsîn ve mi’e ve elf. Şuhûdü’l-hâl: Abdurrahman Çelebi b. Ali Efendi, el-Hâc Hüseyin b. Mehmed, Mustafa Çelebi b. İbrahim, el-Hâc Yusuf Ağa b. Süleyman, Mustafa Efendi b. Hüseyin, Ahmed Efendi b. Mustafa, es-Seyyid Mehmed Çelebi b. Seyyid Mustafa, Hüseyin Çelebi b. Mehmed, Mehmed Çelebi b. Abdullah, Ömer Efendi b. ( ) el-Mukayyid.