Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 111 Hüküm no: 64 Orijinal metin no: [17a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Panayot’un ölen oğlu Nikola’nın terekesinden miras hissesini alması Havâss-ı Refîʻa kazâsına tâbi‘ Litros nâm karye ahâlîsinden olup bundan akdem hâlik olan Nikola v. Panayot v. Dimo nâm zimmînin verâseti zevce-i metrûkesi Malkali bt. Yanaki nâm Nasrâniye ile sulbiye sagīre kızı Eleniye’ye ve babası mesfûr Panayot zimmîye inhisârı tahakkukundan sonra mesfûr Panayot zimmî meclis-i şer‘-i hatîr-i lâzımü’t-tevkīrde sagīre-i mezbûre Eleniye’nin anası ve kıbel-i şer‘den mansûbe vasîsi olup tereke-i hâlik-i mesfûra bi’l-verâse vâzıʻu’l-yed olan işbu hâmiletü’s-sifr mesfûre Malkali nâm Nasrâniye muvâcehesinde ikrâr ve takrîr-i kelâm edip oğlum hâlik-i mesfûr Nikola’dan müntakil mevrûs terekesinden defter-i kassâm nâtıka olduğu vech üzere bi-hasebi’l-irsi’ş-şer‘î bana isâbet ve intikāl eden hisse-i şer‘iyyeyi terekesine vâzıʻu’l-yed olan zevcesi merkūme Malkali Nasrâniye yedinden bi’t-tamam ve’l-kemâl ahz u kabz eyledim, baʻde’l-yevm merkūme Malkali Nasrâniye yedinde ve zimmetinde cihet-i mîrâsdan bir akçe ve bir habbe hakkım bâkī kalmamağla husûs-ı mezbûra müte‘allika âmme-i deʻâvîden zevce-i merkūme Malkali Nasrâniye’nin zimmetini ibrâ-i âm ile ibrâ ve ıskāt eyledim, min-baʻd oğlum hâlik-i mesfûrun terekesine müte‘allik da‘vâ ve nizâ‘ım yokdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsiʻ ve’l-ışrîn min-Rebîʻülâhir li-sene semân ve hamsîn ve mi’e ve elf. Şuhûdü’l-hâl: Davud Paşa ustası Ali Ağa, Bölükbaşı Yusuf Bey, es-Seyyid Mehmed Çelebi, es-Seyyid Ahmed Çelebi ve gayruhum. Yorgo v. Nikola Kasiko, Bakkāl Miho, Bakkāl Kosta v. Palo, Kigo v. Zafiri, Tanaş v. Rini.