Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 112 Hüküm no: 65 Orijinal metin no: [17a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kırkıncı Bölük mütekaidlerinden Hasan Odabaşı’nın terekesi olup beytülmâla intikal eden ev hissesinin hanımı Zeyneb Hatun’a satılması Husûs-ı âti’l-beyânın mahallinde ketb u tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de el-Hâc Hüsrev Mahallesiʼnde sâkin iken bundan akdem vefât eden Kırkıncı Bölük Odası’nın mütekāʻidlerinden Hasan Odabaşı b. Abdullah’ın hayâtında sâkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde müteveffâ-i mezbûrun zâhirde zevce-i menkûha-i metrûkesi Zeyneb Hatun bt. Abdullah’dan gayrı vâris-i ma‘rûfu olmayıp terekesinin rub‘u zevcesi mezbûreye ve selâse-i erbâʻı cânib-i beytülmâla âid olmağın mahmiye-i İstanbul’da hâlâ yeniçeri beytülmâlı kabzına meʼmûr olan fahrü’l-akrân Hüseyin Ağa b. Abdullah tarafından husûs-ı âti’l-beyânda vekîl olduğu İsmail Efendi b. Mustafa ve Ali b. Mehmed nâm kimesneler şehâdetleriyle sâbit ve sübût-ı vekâletine hükm-i şer‘î lâhık olan beytülmâl nâzırı Hüseyin Ağa b. Ahmed meclis-i ma‘kūd-ı mezkûrda müteveffâ-i mezbûrun zevcesi işbu râfiʻatü’l-kitâb mezbûre Zeyneb Hatun mahzarında bi’l-vekâle ikrâr ve takrîr-i kelâm edip müteveffâ-i mezbûrun ile’l-vefât yedinde mülk ve hakkı idiği müsbet olup mahalle-i mezbûrede vâki‘ bir tarafdan Mustafa Çelebi mülkü ve bir tarafdan diğer Mustafa Çelebi mülkü ve bir tarafdan baʻzan Âmine Hatun ve baʻzan mekābir-i Müslimîn ve bir tarafdan tarîk-i âm ile mahdûd bir bâb fevkānî oda ve bir sofa ve bir bâb tahtânî oda ve bir kenîf ve bir mikdâr havluyu muhtevî mülk menzil [17b] sûk-ı sultânîde müzâyede olunup ragabât-ı nâs bi’l-külliye münkatıʻa oldukdan sonra mezbûre Zeyneb Hatun üzerinde yüz kırk guruşda karâr edip ziyâde ile tâlib-i âhar zuhûr etmeyip ve meblağ-ı mezbûr menzil-i mezkûrun el-yevm semen-i misli olduğunu zeyl-i vesîkada muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer oldukdan sonra tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile semen-i misl olan meblağ-ı mezbûr yüz kırk guruşa mezbûre Zeyneb Hatun’a bi’l-vekâle beyʻ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semen-i misli olan meblağ-ı mezbûr yüz kırk guruşu mezbûre Zeyneb Hatun yedinden bi’l-vekâle ahz u kabz eyledim, baʻde’l-yevm mecmû‘-ı menzil-i mezkûr mezbûre Zeyneb Hatun’un mülk-i müşterâsı ve hakk-ı sırfı olmuşdur, keyfe mâ teşâ ve tahtâr mutasarrıfe olsun dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb u tahrîr, ba‘dehû ma‘an baʻs olunan ümenâ-i şer‘le meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâlis aşer min-şehri Rebîʻülâhir li-sene semân ve hamsîn ve mi’e ve elf. Şuhûdü’l-hâl: Mehmed Efendi b. Osman, Mustafa Ağa b. ( ), el-Hâc Hüseyin b. el-Hâc Hüseyin, İbrahim Çelebi b. Ali, Mehmed Bey b. Mustafa, el-Hâc Ali b. İsmail, Ahmed Beşe b. Yusuf.