Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 113 Hüküm no: 66 Orijinal metin no: [17b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb Hatun’un vefât eden kocası Hasan Odabaşı’daki alacağını terekesinden almak istemesi Husûs-ı âti’l-beyânın mahallinde istimâ‘ ve tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de el-Hâc Hüsrev Mahallesiʼnde sâkin iken bundan akdem vefât eden Kırkıncı Bölük Odası’nın mütekāʻidlerinden Hasan Odabaşı b. Abdullah’ın hayâtında sâkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde müteveffâ-i mezbûrun zevce-i menkûha-i metrûkesi olup zâtı ta‘rîf-i şer‘î ile mu‘arrefe olan işbu râfiʻü’l-kitâb Zeyneb Hatun bt. Abdullah meclis-i ma‘kūd-ı mezkûrda müteveffâ-i mezbûrun terekesine bi’l-emâne vâzıʻu’l-yed olup mahmiye-i İstanbul’da Yeniçeri beytülmâlı emîni olan fahrü’l-akrân Hüseyin Ağa b. Abdullah tarafından vekîl-i sâbitü’l-vekâlesi olan beytülmâl nâzırı Hüseyin Ağa b. Ahmed mahzarında üzerine da‘vâ ve takrîr-i kelâm edip zevcim müteveffâ-i mezbûr Hasan Odabaşı b. Abdullah b. Abdurrahman zimmetinde cihet-i karz-ı şer‘îden yüz guruş hakkım olup hatta müteveffâ-i mezbûr hâl-i hayâtında ve kemâl-i akl [u] sıhhatinde fevtinden sekiz ay mukaddem meblağ-ı mezkûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimîn’de ikrâr ve işhâd edip kable’l-edâ fevt olmağla meblağ-ı mezbûru terekesinden taleb ederim, suâl olunsun dedikde gıbbe’s-suâl ve’l-inkâr müdde‘iye-i mezbûreden müddeʻâsına mübeyyin beyyine taleb olundukda udûl-ı ahrâr-ı ricâl-i Müslimîn’den medîne-i mezbûrede Nazperver Mahallesiʼnde sâkin Mehmed b. Hüseyin ve diğer Mehmed Ağa b. Hasan nâm kimesneler li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-i mezbûr Hasan Odabaşı b. Abdullah b. Abdurrahman zimmetinde cihet-i karz-ı şer‘îden zevcesi işbu müdde‘iye-i mezbûre Zeyneb Hatun’un yüz guruş hakkı olup hatta müteveffâ-i mezbûr hâl-i hayâtında ve kemâl-i akl [u] sıhhatinde fevtinden sekiz ay mukaddem meblağ-ı mezbûr cihet-i merkūmeden zimmetinde zevcesi müdde‘iye-i mezbûre Zeyneb Hatun’a vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye ettikde ba‘de’t-taʻdîl ve’t-tezkiye şehâdetleri makbûle olmağın gıbbe’t-tahlîfü’ş-şer‘î mûcebiyle baʻde’l-hükm vâki‘ hâli mevlânâ-yı mezbûr mahallinde ketb u tahrîr, ba‘dehû ma‘an baʻs olunan ümenâ-i şer‘le meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâlis aşer min-Rebîʻülâhir sene semân ve hamsîn ve mi’e ve elf. Şuhûdü’l-hâl: Mehmed Efendi b. ( ), Mustafa Ağa b. ( ), el-Hâc Hüseyin b. ( ), el-Hâc Hasan, İbrahim Çelebi b. Ali, Mehmed Bey b. Mustafa.