Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 116 Hüküm no: 68 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe’nin Süleyman Beşe’den alacak talebine iltifat edilmemesi Havâss-ı Refîʻa kazâsı muzâfâtından Terkos nâhiyesine tâbi‘ Yassıviran nâm karyede sâkin Ali Beşe b. Mehmed nâm kimesne meclis-i şer‘-i şerîf-i enverde işbu râfiʻü’l-kitâb Süleyman Beşe b. Ahmed mahzarında üzerine da‘vâ ve takrîr-i kelâm edip karye-i mezbûrede sâkin iken bundan akdem vefât eden Kalyoncu Mehmed Beşe b. Hüseyin zimmetinde cihet-i deyn-i şer‘îden yüz yirmi guruş hakkım olup müteveffâ-i mezbûrun zimem-i nâsda olan hukūkunu merkūm Süleyman ahz u kabz etmekle meblağ-ı mezbûru taleb ederim deyü da‘vâ eyledikde merkūm Süleyman Beşe müteveffâ-i mezbûrun vârisi olmayıp veresesi muvâcehesinde meblağ-ı mezbûrun isbâtı lâzım gelmekle merkūm Ali Beşe’nin da‘vâsına iltifât olunmayıp bî-vech mu‘ârazadan men‘-birle mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Rebîʻülâhire li-sene semân ve hamsîn ve mi’e ve elf. Şuhûdü’l-hâl: Ebûbekir Ağa b. ( ), Mustafa Efendi b. Hüseyin, Ahmed Efendi b. Mustafa, es-Seyyid Mehmed b. es-Seyyid Mustafa, Hüseyin Çelebi b. Mehmed, es-Seyyid Ahmed b. es-Seyyid Mehmed.