Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 117 Hüküm no: 70 Orijinal metin no: [18b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tarandafil’in, annesi Katerina bt. Kosta’nın terekesindeki hissesini üvey babası Mihal v. Yorgi’den alması Husûs-ı âti’l-beyânın mahallinde ketb u tahrîri iltimâs olunmağın savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi Havâss-ı Refîʻa kazâsına tâbi‘ Karfa nâm karyede mütemekkine iken bundan akdem hâlike olan Katerina bt. Kosta’nın hayâtında mütemekkine olduğu menzile varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i Nebevî ettikde hâlike-i mezbûrenin verâseti zevci metrûke Mihal v. Yorgi ile sadrî kebîr oğlu Tarandafil ve sagīr oğlu Bakame’ye münhasıra ve tashîh-i meseleleri sekiz sehmden i‘tibâr olunup sihâm-ı mezbûreden iki sehmi mezbûr Mihal’e ve üçer sehmi oğulları mezbûrândan herbirine isâbeti tahakkukundan sonra mezbûr Tarandafil meclis-i ma‘kūd-ı mezkûrda sagīr-i mesfûrun babası ve tesviye-i umûruna vasîsi olup tereke-i hâlike-i mesfûreye bi’l-vesâye ve bi’l-verâse vâzıʻu’l-yed olan işbu râfiʻü’s-sifr üveyi babası mesfûr Mihal muvâcehesinde ikrâr ve takrîr-i kelâm edip anam hâlike-i mezbûrenin terekesi tahrîr ve ba‘de ihrâci’l-mesârif ber-mûceb-i defter-i kassâm hisseme isâbet eden altı bin beş yüz kırk beş akçeyi terekeden olmak üzere bana def‘ ve teslîm edip ben dahi ber-vech-i muharrer meblağ-ı mezbûru üveyi babam mezbûr Mihal yedinden bi’t-tamam ve’l-kemâl ahz u kabz edip meblağ-ı mezbûrdan mesfûr Mihal yedinde ve zimmetinde bir akçe ve bir habbe hakkım bâkī kalmadı dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb u tahrîr ve ba‘dehû ma‘an baʻs olunan Çukadâr Ali Çelebi ve Muhzır Mehmed ile meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-hâmis aşer min-Rebîʻi’l-evvel li-sene semân ve hamsîn ve mi’e ve elf. Şuhûdü’l-hâl: Es-Seyyid Mehmed Çelebi b. es-Seyyid Mustafa, es-Seyyid Ahmed b. Mehmed, es-Seyyid Mollâ Ömer Beşe b. Ahmed, Musa b. Abdullah.