Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 131 Hüküm no: 86 Orijinal metin no: [21b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb Hatun’un kocası Kırımlı Ali Odabaşı’nın terekesini eski vasi el-Hâc Halil’den alması Fi’l-asl Kırım adasında vâki‘ Gözleve kasabasında Balizâde Mahallesi’nden olup medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Otakçıbaşı Mahallesiʼnde sâkin iken bundan akdem vefât eden Ali Odabaşı b. el-Hâc Osman’ın verâseti zevce-i menkûha-i metrûkesi Zeyneb Hatun bt. Mustafa ile sulbî sagīr oğlu Abdurrauf’a münhasıra olduğu şer‘an zâhir ve müteʻayyen oldukdan sonra sagīr-i mezbûrun vâlidesi ve tesviye-i umûruna vasiyy-i muhtârı olduğu müsbet olan mezbûre Zeyneb Hatun tarafından husûs-ı âti’l-beyânda kefîl olduğu zât-ı mezbûreyi bi’l-ma‘rifeti’ş-şer‘iyye ârifân İbrahim Çelebi b. Halil ve Mehmed Çelebi b. Yusuf şehâdetleriyle şer‘an sâbit ve sübût-ı vekâletine hükm-i şer‘î lâhık olan Abdurrahman Çelebi b. el-Hâc Musa meclis-i şer‘-i şerîf-i enverde işbu râfiʻü’l-kitâb el-Hâc Halil b. Ali mahzarında bi’l-vekâle ikrâr-ı tâm ve takrîr-i kelâm edip müteveffâ-i mezbûrun sâlifü’z-zikr Gözleve kasabasında olan terekesi vasiyy-i muhtârı mezbûr el-Hâc Halil ma‘rifeti ve ma‘rifet-i şer‘le tahrîr ve ba‘de ihrâci’l-mesârif ve’d-düyûn ber-mûceb-i defter-i kādı-yı Gözleve bi’l-vesâye makbûzu olup Kırım hesâbı üzere altmış altı bin sekiz yüz otuz beş akçe ve beyne’n-nâs râyic fi’l-vakt akçeden yirmi altı bin yedi yüz altmış akçe olmağla müteveffâ-i mezbûr hâl-i sıhhatinde fevtinden iki gün mukaddem mezbûr el-Hâc Halil vesâyetten azil ve ihrâc ve müvekkilem mezbûre Zeyneb Hatun’u vesâyâ-yı ma‘lûmesini tenfîze ve sulbî sagīr oğlu Abdurrauf’un tesviye-i umûruna vasiyy-i muhtâr eylediği münkir-i mezbûr el-Hâc Halil muvâcehesinde baʻde’l-isbât ve’l-hükm mûcebiyle edâ ve teslîme tenbîh-i şer‘î olunmağla binâen-aleyh tereke-i müteveffâ-i mezbûrdan makbûzu olan meblağ-ı mezbûr yirmi altı bin yedi yüz altmış akçeyi merkūm el-Hâc Halil bana def‘ ve teslîm, ben dahi ber-vech-i muharrer meblağ-ı mezbûru bi’l-vekâle yedinden bi’t-tamam ve’l-kemâl ahz u kabz eyledim, meblağ-ı mezbûrdan merkūm el-Hâc Halil yedinde ve zimmetinde bir akçe ve bir habbe bâkī kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin min-Recebi’l-ferd sene semân ve hamsîn ve mi’e ve elf. Şuhûdü’l-hâl: Mahmud Çelebi b. Hasan, Hasan Çelebi b. Mehmed, Mustafa Efendi b. Hüseyin, Mollâ Yunus b. Ali, Salih Efendi b. Ebûbekir.