Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 133 Hüküm no: 88 Orijinal metin no: [22a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halime Hatun bt. Abdullah’ın vârislerinden yeğeni Ebûbekir’in terekeden hissesini alması Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Câmi‘-i Kebîr Mahallesi sâkinelerinden olup mahmiye-i İstanbul’da Servi Mahallesi’nde vefât eden Halime Hatun bt. Abdullah’ın verâseti sulbiye kebîre kızları Hadice ve Fâtıma Hatun ibnetey ( ) ile li-ebeveyn er karındaşı oğulları Mehmed Emin ve Ebûbekir nâm sagīrlere münhasıra ve tashîh-i meseleleri altı sehmden i‘tibâr olunup sihâm-ı mezbûreden ikişer sehmi kızları mezbûretândan herbirine ve birer sehmi sagīrân-ı mezbûrân Mehmed Emin ve Ebûbekir’den herbirine isâbeti tahakkukundan sonra sagīr-i mezbûr Ebûbekir’in vâlidesi ve tesviye-i umûruna vasîsi olup zâtı ta‘rîf-i şer‘î ile mu‘arrefe olan Fethi Hatun bt. Abdullah meclis-i şer‘-i şerîf-i enverde müteveffât-ı mezbûrenin kızları olup terekesine bi’l-verâse vâzıʻateyi’l-yed olan Hadice Hatun’un zevci ve tarafından husûs-ı âti’l-beyânda tasdîka vekîl-i sâbitü’l-vekâlesi Osman Ağa b. ( ) ile kezâlik mezbûre Fâtıma Hatun’un tarafından husûs-ı âti’l-beyânda tasdîka vekîl-i sâbitü’l-vekâlesi olan sagīr-i mezbûr Mehmed Emin’in vasîsi işbu râfiʻü’l-kitâb İbrahim Bey b. Selim Ağa mahzarında bi’l-vesâye ikrâr-ı tâm ve takrîr-i kelâm edip müteveffât-ı mezbûrenin terekesi tahrîr ve ba‘de ihrâci’l-mesârif ve’d-düyûn ber-mûceb-i defter-i kassâm oğlum sagīr-i mezbûr Ebûbekir’in tashîh-i merkūm üzere hissesine isâbet eden altı bin yüz beş akçeye hissesinden ezyed bin seksen akçe ki min-haysü’l-mecmû‘ yedi bin yüz seksen beş akçeyi terekeden olmak üzere vasiyy-i merkūm İbrahim Bey ve müvekkiletân-ı mezbûretân Hadice ve Fâtıma bana def‘ ve teslîm, ben dahi ber-vech-i muharrer meblağ-ı mezbûru bi’l-vesâye bi’t-tamam ve’l-kemâl ahz u kabz eyledim, meblağ-ı mezbûrdan vasiyy-i merkūm İbrahim Bey ile müvekkiletân-ı mezbûretân Hadice ve Fâtıma nâm hatunların yedlerinde ve zimmetlerinde bir akçe ve bir habbe bâkī kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin min-Cemâziyelâhir sene semân ve hamsîn ve mi’e ve elf. Şuhûdü’l-hâl: Ahmed Efendi b. Mustafa, Mustafa Efendi b. Hüseyin, es-Seyyid Mehmed b. es-Seyyid Mustafa, Ahmed Ağa b. el-Hâc Ali, Hüseyin Çelebi b. Mehmed.