Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 134 Hüküm no: 89 Orijinal metin no: [22a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah Hatun’un vasiyetini yerine getiren zevci ve vasisi es-Seyyid Ahmed Ağa’nın muhasebesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Selâhi Mehmed Bey Mahallesiʼnde sâkine iken bundan akdem vefât eden Emetullah Hatun bt. Mehmed’in zevci ve sülüsünü tenfîze bâ-hüccet-i şer‘iyye vasiyy-i muhtârı olan es-Seyyid Ahmed Ağa b. es-Seyyid Mehmed’in üzerine hasbî nâzırı es-Seyyid Mehmed b. es-Seyyid Mustafa ma‘rifetiyle müteveffât-ı mezbûrenin sülüsünden vasiyy-i mezbûrun makbûzu ve masrûfunun hesâbı defteridir ki ber-vech-i âtî zikr olunur. Fi’l-yevmi’l-âşir min-Recebi’l-ferd sene semân ve hamsîn ve mi’e ve elf. Ber-mûceb-i defter-i müfettiş vasiyy-i mezbûrun sülüsünden makbûzu meblağ: 13.313 #&# Minhâ el-mesârif: Telkīn için imâma vasiyy-i mezbûrun verdiği 150 akçe Iskāt-ı salât için vasiyy-i mezbûrun masrûfu 1.600 akçe Müteveffât-ı mezbûrenin zimmetinde verilen tasadduk 600 akçe Ber-mûceb-i vasiyyet eyyâm-ı mu‘tâde tabh-ı taʻâm ve itʻâm-ı fukarâ için vasiyy-i mezbûrun masrûfu 2.590 akçe Ber-mûceb-i vasiyyet vasiyy-i mezbûrun iştirâ eylediği üç aded mushaf-ı şerîf 4.800 akçe [22b] Müteveffât-ı mezbûrenin ta‘mîr-i kabr ve taş ve sâir mesârif ber-mûceb-i vasiyyet 3.093 akçe Harc-ı defter 300 akçe Kalemiye-i kâtib 120 akçe Hüddâmiye ve kaydiye 60 akçe Yekûn: 13.313 akçe. Vasiyy-i mezbûr es-Seyyid Ahmed Ağa’nın nâzır-ı merkūm es-Seyyid Mehmed ma‘rifetiyle muhâsebesi görülüp bâlâda mezkûr on üç bin üç yüz on üç akçeyi harc u sarf edip meblağ-ı mezbûrdan vasiyy-i merkūm yedinde ve zimmetinde bir akçe ve bir habbe bâkī kalmayıp tahlîf dahi olunduğu işbu mahalle şerh verildi.